Пролетта е период на полен и алергии

Покрај тоа што досега не е пронајден лек за пролетните алергии, постојат многу начини за нивно третирање и ублажување на симптомите, започнувајќи од фармацевтски лекови, па сè до домашни навики

Луѓето со нетрпение ја очекуваат пролетта која со себе носи радост од топлина, сонце, природни звуци, интересни животинки и инсекти, бои, цветови, мириси, полен… Сепак, за луѓето кои имаат алергии, пролетта е еден од најнепријатните периоди од годината. За нив ова е вообичаен период на кивање и шмркање. Алергиите најчесто се дијагностицираат со помош на тестови на кожата или тестови на крвта.

Што ги предизвикува пролетните алергии?

Имуниот систем на луѓето алергични на поленов прав, поленот од атмосферата го третира како надворешна закана. Имунитетот ослободува антитела – клетки и супстанци што во нормални услови ги идентификуваат и напаѓаат бактериите, вирусите и други микроорганизми што предизвикуваат болести. Антителата ги напаѓаат алергените, што доведува до ослободување на хемикалиите наречени хистамини во крвта. Хистамините се причина за нос кој постојано тече, насолзените очи што чешаат, кивавицата, вртоглавиците и останатите симптоми на алергиите.

Колку е поголема количината на полен, толку поголеми проблеми имаат оние кои се алергични. 

Метеоролошките станици во поразвиените држави секојдневно ја мерат количината на алергени во воздухот на метар кубен. Алергичните луѓе треба постојано да го следат тој индекс. Симптомите на алергиите се позачестени кога надвор времето е поветровито. Дождливото време од друга страна пак, предизвикува намалување на количината на полен, затоа што дождот ги измива алергените.

Како да се третираат алергиите? 

Алергискиот ринитис е најчеста алергиска болест, а тоа означува воспаление на назалните дишни патишта. Пропратното чешање и црвенило на очите може да се третира со капки за очи. Д-р Алан Рединг – Alan Redding, основачот на центарот за астма и алергии Redding Allergy and Asthma Center, препорачува да се започне со антихистамини и назални стероиди пред алергиите да станат сериозни. Според него тие треба да се користат „неколку дена или дури и неколку недели пред алергиската сезона“. 

„Оралните деконгестанти се она што најчесто го препорачуваме. Назалните деконгестанти се одлични лекови за користење во период од неколку денови. Назалната иригација пак, претставува испирање на носот со спреј од морска вода или преку инхалација, со што се отстрануваат алергените. Овде нема медикамент, туку само солена вода. Затоа разговарајте со вашиот алерголог околу лековите, домашните препарати, промената на животниот стил што можете да ја направите за да ги намалите симптомите“ – објаснува д-р Алан.

Само затоа што одредени препарати против алергии се квалификувани како природни, тоа не мора да значи дека се безбедни. Одредени лекови на билна база може да предизвикаат споредни ефекти и да колидираат со дејството на други лекови. Затоа консултирајте се со лекар пред да започнете да земате суплементи на своја рака.
[interaction id=”571f7a2ef28e4ea971cca6c1″]

Дали алергиите се наследни, вродени или се стекнуваат? 

Доколку имате алергија, тоа не значи дека автоматски алергично ќе биде и вашето дете, објаснуваат на WebMD. Сепак, гените играат голема улога во појавата на овој здравствен проблем. Доколку имате алергија, вашите деца се изложени на 50% шанса исто така да бидат алергични. Доколку другиот родител исто така е алергичен, шансите се зголемуваат за 75%. Експертите веруваат дека другите фактори се исто така значајни, како загаденоста на воздухот, респираторните инфекции, па дури и диетата и емоционалната состојба.