Симптоми на тензиска главоболка
Главоболката е еден од најчестите симптоми кај луѓето што подразбира болка во пределот на главата, лицето и горниот дел на вратот. Во текот на животот главоболката се јавува најмалку еднаш кај 70-95 % од луѓето и тоа најчесто на возраст од 20 до 40 години.
Најчест тип на главоболка е тензискиот тип кој ги вклучува и мускулната тензија и психичкиот стрес како причини, а често е поврзана и со нарушувањата на спиењето. Најчеста причина за појава на тензиската главоболка е стегнатоста во вратната мускулатура. Понекогаш причините можат да бидат емоционален стрес, неудобна положба на телото и вратот, глад, хроничен замор, алкохол, цигари, кофеин итн. Епизодната главоболка понекогаш може да прогресира во честа, па дури и во хронична главоболка. Во комплицираните случаи, тензискиот тип главоболка се јавува заедно со мигрената. Почесто се јавува кај жени, најчесто помеѓу 20- 50 година од животот.
Симптоми на тензиска главоболка
- Постојана тапа болка која притиска и стега и прогресивно се зголемува како наближува вечерта.
- Болката е обично обострана, се појавува во вратот, подтилна, слепоочна, челна и темена регија.
- Болката е лесна до умерено силна но многу упорна, може да трае со денови и да не реагира на терапија, а најчесто од 30 минути до 7 дена.
- Понекогаш навечер се јавува отрпнатост на горните екстремитети.
- Вртоглавица може да се јави при седење и стоење.
- Ако се направи рентгенграфија на цервикалниот ’рбет често се открива лордоза.
Третман на тензиска главоболка
Третманот, во основа не е фармаколошки, се состои од: физички вежби (утринско истегнување, пешачење, пливање), ергономско седење, физикална терапија, масажа, релаксација (јога и пилатес) и акупунктура. Во однос на лековите кои се користат, се препорачува краткотрајна (5-дневна) употреба на парацетамол или нестероидни анти инфламаторни лекови, понекогаш во комбинација со миорелаксанти или анксиолитици. Зависно од симптомите и процената на лекарот може да се употребуваат и антиеметици и антидепресиви.
Тензиската главоболка може да се превенира. Превенцијата вклучува соодветно реагирање и решавање на конфликтните ситуации, адекватен сон, здрав режим на исхрана и редовна физичка активност. Внесување на додатоци во исхраната на база на колаген, глукозамин, куркума, индиски темјан и др. може да помогнат за проблемите со ‘рбетот а магнезиумот помага за мускулна релаксација и опуштање.
