Воспалението на синусите (синузитис) резултира со разни вирусни инфекции, додека причинители за синузит може да бидат и алергените во воздухот
Синузитис, или риносинузит е инфламација на мукозата на синусите. Синузитот е резултат на опструкција или конгестија, со што параназалните синуси се блокираат. Кога синусите се блокирани или премногу слуз е присутна во синусните комори, се добива совршена подлога за инфекции предизвикани од бактерии, вируси или габи. Во зависност од тоа колку време траат симптомите, постои акутен кој трае помалку од четири недели, субакутен кој трае четири до дванаесет недели, хроничен- дванаесет недели и повеќе и повторлив синузит кој се јавува во вид на три акутни епизоди во тек на една година. Акутниот синузит може да биде предизвикан од бактерии, вирусни или фунгални инфекции.
Причинители за синузит може да бидат и алергените во воздухот.
Во повеќето случаи, акутниот синузит е предизвикан од вирусни инфекции во горниот респираторен тракт. Хроничниот синузит е резултат на отоци и инфламација која трае подолго време. Може да биде предизвикан од периодични епизоди на акутен синузит, или од други состојби како астма, алергиски ринит, имунолошки пореметувања или структурни абнормалности како девијација на септумот или назални полипи. Загадениот воздух е исто така ризик фактор за хроничниот синузит. Тука спаѓаат честичките во воздухот од индустриските хемикалии, чадот од цигари, и други загадувачи кои можат да ги оштетат цилиите (трепките) кои ја транспортираат слузта преку синусот. Загадениот воздух е важен ризик фактор , но сепак не се знае точно кои загадувачи се критични. Кај пушачите е зголемен ризикот од сунизит. Што се однесува до пасививните пушачи нема сигнификантен ефект кај возрасните , но ризикот за синузит е зголемен кај децата.
Хроничниот и акутниот синузит имаат слични знаци и симптоми, со тоа што акутниот синузит е често придружен со настинка. Најмалку две од следниве симптоми треба да се присутни кај пациентите за да се дијагностицира хроничен синузит. Дренажа на густ, жолт или зеленикав исцедот од носот, назална опструкција или когестија која предизвикува потешкотии при дишењето, болка и оток околу очите, образите, носот и челото и намалено чувство за мирис и вкус. Третманот на хроничниот синузит опфаќа испирање со физиолошки раствор, кортикостероидни назални спрејови, или орални кортикостероиди кај пациенти кои не реагираат на назални кортекостероиди. Употребата на антибиотици е контраверзна, се користат само одредени антибиотици. Доколку нема подобрување на состојбата, се препорачува и хируршки третман.
Д-р Зоран Максимовиќ, специјалист по оториноларингологија
