Лекарите од школата за стоматологија при Универзитетот во Пенсилванија за прв пат ја прикажаа комерцијалната одржливост од големото производство на евтини лекови произведени од цели растенија
„Над 90% од глобалната популација не е во можност да си обезбеди протеински лекови, како што е инсулинот, поради трошоците при производството, но и неопходното ладење за складирање или транспорт. Јас сум решен да го ставам на предизвик ова сценарио“ – рече Д-р Хенри Даниел – Henry Daniell, професор на катедрата за биохемија од Penn Dental Medicine и главниот автор на студијата. Toj упорно работи за да се надминат овие препреки со помош на систем на растителна основа, со цел да се произведат лекови лесни за складирање.
Во една неодамнешна студија објавена во Biomaterials, Д-р Хенри и неговите колеги направија огромен напредок со тоа што ја потврдија ефикасноста на нивниот метод, како за одобрување од страна на Американската агенција за храна и лекови, така и за употреба од страна на луѓето. Тие го претставија производството на лекови што нудат толеранција кон коагулациони фактори (протеините во крвта што го контролираат крварењето), кои можат да ги користат пациентите со хемофилија, користејќи капсули од „суво-замрзната“ марула.
„Ова е пресвртница во нашата област, да произведеме потполно функционални лекови од растенија, да ги произведеме во голем обем и во количини доволни за клинички испитувања на пациенти“ – објаснува д-р Хенри. „Ова го менува начинот на кој ние размислувавме во врска со производството на лекови на протеинска база и ги прави прифатливи за глобалната популација“ – додава тој.
Истражувањето се надоврзува на претходните истражувања на Д-р Хенри. Тој порано употребувал генетски модифицирани растенија за да внесе протеини во организмот, што би го научило имуниот систем да ги толерира коагулационите фактори коишто се давани на пациентите за лекување на хемофилија.
Вообичаено, 20-30% од луѓето кои примаат инфузии со коагуланси, развиваат антитела против нив, што во голема мера го отежнува лекувањето. Поранешната студија успешно го сопре производството на овие инхибитори на коагулационите фактори кај глувци со хемофилија од типот А, со помош на едноставно хранење на глувците со лекови на растителна основа.
Студијата спроведена на глувците користела растителна платформа од тутун за растење на лекот.
За обидот да се спроведе на луѓе, Д-р Хенри Даниел и неговиот тим одлучија да употребат растителна основа од марула. Тимот го идентификуваше генетскиот вектор за да го воведе терапевтскиот ген во ДНК на растението, за да може лекот да порасне на листовите од марулата, кои потоа поминуваат нив процесот на „суво-замрзнување“ и ставање во капсули.
