Совети како да постапите доколку вашето дете ви постави прашање поврзано со секс
Повеќето родители остануваат без текст кога нивните најмили одненадеж ќе постават прашање на тема поврзана за сексот. Не постои конкретна возраст кога детската љубопитност ќе стигне во ова поле, но нека не ве изненадува доколку тоа е многу рано, сепак тоа е сосем нормално. Некои родители ги игнорираат прашањата и се надеваат дека детето ќе научи со тек на време, додека некои сериозно разговараат и објаснуваат. Од друга страна, одговорите зависат и од нивото на детската љубопитност и секако, од нивната возраст. Ви нудиме неколку совети кои што може да ви помогнат да ги надминете непријатните ситуации и да создадете подобра комуникација со вашето дете со цел да изградите взаемна доверба.
Понудете конкретен одговор
Никогаш не ја пропуштајте можноста за подучување осносно воспитување. Доколку вашето дете постави конкретно прашање, одговорете го најточно што знаете и нивото на информацијата прилагодете го според возраста. Не заобиколувајте го одговорот, бидејќи доколку дадете колеблив одговор, вашето дете нема да ви верува, што понатаму може да резултира со лоша комуникација.
Не проширувајте непотребно
На пример, доколку вашето дете праша како се раѓаат бебињата, објаснете му дека излегуваат од конкретен дел на женското тело, кој што е создаден токму за тоа, но внимавајте да не навлегувате во дополнително објаснување како бебето стигнало дотаму. Верувајте, ќе стигне на ред и тоа прашање, а со претераното објаснување само непотребно ќе начнете уште многу нови прашања на кои вашето дете ќе бара одговори.
Не користете премногу метафори
Во зависност од возраста, кажете ги нештата со нивното вистинско име. Со текот на годините, само проширувајте ги информациите. Понудете едноставен и точен одговор, без многу метафори кои што можат додатно да го збунат детскиот памет и начин на размислување.
Искористете стручна литература
Кога детето е доволно возрасно и знае да чита, купете му литература наменета според возраста, која што го објаснува човековиот развој и репродуктивниот систем. На овој начин, вашето дете ќе научи за она што го интересира, без непријатните разговори. Сепак, знајте дека разговорите на релација дете – родител се незаменливи и градат трајна и силна взаема врска која ќе трае цел живот.
