Aдаптивниот одговор што се случува кај пливачите, значи дека тие можат да преживеат и пониски температури на водата.
Нашата основна телесна температура е стабилна, но може и лесно да варира (помеѓу 36,5 и 37,5°C) во зависност од времето во текот на денот, температурата на околината, нашата облека, вежбањето, поткожното масно ткиво, како и од она што секојдневно го консумираме. Тоа е балансирачко дејство помеѓу факторите што ја задржуваат топлината и оние кои ја намалуваат. Клиничка хипотермија се смета за температура на телото од 35°C. Повеќето луѓе ќе ги почувствуваат ефектите на хипотермијата многу пред нивната температура на телото да се излади до 35°C. Овие знаци вклучуваат ментална конфузија, нејасен говор и слаба координација на движењата.
Лесно е да ја започнете вашата пливачка кариера во летото кога температурата на водата е минимум 16°C. Сепак, голем предизвик е да се плива во ладна вода за време на есенските и во текот на зимските денови. Првото нешто што ќе ви се случи кога ќе влезете во ладната вода е справувањето со ладниот шок – почетното забрзување на работата на срцето, забрзаното дишење, зголемувањето на пулсот. Заедно со нив, истовремено се лачат и хормоните на стрес. Меѓутоа, ако само неколку пати се нурнете во вода поладна од 15 степени, стресната реакција полека ќе се намалува. Пливањето во ладна вода, исто така, може да го намали и хроничниот одговор на стресот, како и воспаленијата и психолошките проблеми кои можат да влијаат на секого од нас.
Репетитивните експозиции на пливање во ладна вода, ја намалуваат длабоката телесна температура и се основен стимул за адаптирање на овај процес.
Затоа пливачите можат да се адаптираат на ова многу брзо. Нашето тело има капацитет да се прилагоди на студот. Главниот извор на адаптација што се стекнува за полесно прилагодување на студот е нашиот мозок.
Според истражувањата, постојат неколку адаптивни процеси кои можат да предизвикаат метаболичка адаптација, која вклучува зголемување на треперењето, како одговор за поголемо генерирање на топлина. Сепак, преовладувачкиот адаптивен процес кај пливачите во ладна вода е комбинација на изолативни и хипотермни адаптации. Изолативна адаптација ни укажува на тоа дека крвните садови кои ја снабдуваат кожата со крв се намалуваат во обем и големина, ограничувајќи го протокот на крв на површината на кожата (вазоконстрикција) и повторната изложеност може само да го стимулира брзиот вазоконстрикторски одговор. Ова ќе осигура дека топлината во снабдувањето со крв се преместува во виталните ткива длабоко во телото, оставајќи ја кожата, рацете и нозете, односно периферијата да се оладат во поголема мера, за сметка на јадрото односно трупот. Оваа поголема чувствителност кон студ може исто така да значи дека е потребно повеќе време за да ги загреете вашите раце и нозе во споредба со вашите пријатели кои не биле изложени на ладно, бидејќи крвните садови се побавно се отвораат како и побавно е враќањето на крвта во прстите. Хипотермичната адаптација ја намалува температурата. Треперењето се стимулира за да се зголеми длабоката телесна температура. Со повторените експозиции на пливање во ладна вода се намалува длабоката телесна температура, а ова ќе го намали треперењето. Тоа му овозможува на пливачот да го координира движењето.
Важно е да се напомене дека длабоката телесна температура на која тресењето се случува кај некој што е прилагоден е поблиску до состојбата на клиничката хипотермија (температурата на телото во јадрото е 35°C) од неприлагодените поединци. Затоа, оние што се прилагодени на ладно треба да го „слушаат сопственото тело“. Ако почнуваат да се тресат, тие мора да излезат од водата и да започнат со процесот на загревање.
Изминатото време во вода не е само одраз на состојбата на адаптација, туку се должи и на комбинација на фактори кои се однесуваат на секој поединец, вклучувајќи ја нивната маса, дебелина, физичка кондиција, режимот на исхрана и колку долго лицето е стационарно. Неодамнешната технологија и истражувањата сугерираат постоење на кафеаво адипозно ткиво (Brown Adipose Tissue) кај возрасните луѓе; за кое претходно се мислеше дека е присутно само кај бебињата. Сепак, сега е откриено дека постои и кај некои лица кои се изложени на студ!
Откако ќе излезете од вода, вашето тело продолжува да се лади уште 20-30 минути, така што длабоката телесна температура ќе биде поладна 20-30 минути по пливањето. Задолжително е по пливањето да облечете топла облека и да пиете топли напитоци, се со цел вашето тело на полесен начин и побрзо да ја врати нормалната телесна температура.
