Откријте ги можните причини зошто сте секогаш гладни како и неколку начини како да победите гладот
Дали сте постојано гладни и чувствувате глад набрзо после оброкот? Како се справувате со „игрите на гладта“ во текот на денот, а особено во вечерните часови? Знајте дека постојат неколку причини, како и здравствени состојби за вашиот зголемен апетит кои што немаат никаква врска со вашата љубов кон храната.
Виновни се хормоните
Главните виновници се викаат лептин и грелин. Ниското ниво на лептин дава постојано чувство на глад, а високото ниво на грелин го зголемува апетитот и желбата за благо. Секако дека овие хормони треба да бидат поттикнати од нешто, а главните причини се: недостаток на сон (го намалува нивото на лептин а го зголемува на грелинот), стресот (го зголемува ризикот од отпорност на лептин), диети со гладување (јо-јо ефектот од брзите диети е заради дисбалансот на овие хормони). Секако дека за чувството на глад не се задолжени само овие хормони, туку тоа чувство претставува сложен процес од комуникацијата и функцијата на хормоните кортизол, естроген и инсулин.
Постојано брзате
Многуте обврски често значат и јадење набрзина, а тоа значи и внесување повеќе храна отколку што ви е потребно. Потребни се 15 до 20 минути да стигне информацијата до мозокот за да даде знак на ситост, затоа јадете бавно и добро џвакајте го секој залак.
Внесувате процесирани јаглехидрати
Процесирани јаглехидрати како колачи и бисквити го задоволуваат гладот но само кратко, бидејќи содржат „празни“ калории. Недостатокот од нутритивна вредност која што ја поседуваат да речеме, производите од цело зрно, води кон намалување на способноста на телото да создава серотонин, поврзан со чувството на ситост по завршувањето со јадење.
Имате недостаток на витамин Д
Освен што е заслужен за формирање на здрави коски, витаминот Д го ослободува хормонот лептин, кој што го регулира апетитот. Доколку имате недостаток на витамин Д, се јавува зголемен глад и тогаш кога имате внесено храна. Овој проблем лесно се решава со земање на суплементи, но најдобро е преку природни извори, како млечни производи и риба, и секако умерено изложување на сонце.
Под стрес сте
Иако се смета дека за време на стресните периоди, се намалува апетитот, всушност ова се однесува само доколку тој стрес е привремен. За време на хроничниот стрес, доаѓа до зголемување на крвниот притисок, се троши повеќе енергија бидејќи метаболизмот забрзано работи и се истоштува, потребна му е поголема количина на храна. Стресот често е поврзан и со неквалитетниот сон кој го намалува нивото на лептин, односно го зголемува чувството на глад.
Пиете алкохол
Консумирањето алкохол ја зголемува желбата за шеќер и за солена храна. Исто така, ја намалува самоконтролата, што значи дека кога пиете, поголеми се шансите да јадете повеќе од што ви е потребно, како и да јадете брза храна.
Здравствени состојби кои што се манифестираат со чувство на зголемен глад се: бременост, ниско ниво на шеќер, дијабетес, депресија, вознемиреност, сезонска депресија, постпородилна депресија, булимија, Базедова болест, зависност од никотин и многу други.
Докажани начини како да победите гладот:
- Внесувањето на протеини го намалува гладот и помага при губење на телесна тежина;
- Јадете храна богата со растителни влакна која што долго време ќе ве држи сити;
- Пијте кафе. Пептидот во кафето дава чувство на ситост;
- Пијте вода пред јадење. Истражувањата докажале дека луѓето што пијат две чаши вода непосредно пред јадење, јадат 22 проценти помалку од оние кои што не пијат воопшто вода пред да седнат да јадат.
