Во ладните зимски празнични денови загрејте ги сетилата со два едноставни рецепти – подароци
За овие едноставни рецепти потребно ви е навистина малку време, а добивате вкусни закуски кои што се грицкаат уште побрзо од тоа што се прават.
Ореви со кафе
- 1/4 шолја еспресо (или 1 лажица инстант еспресо растворена во 1/4 шоља вода);
- 1/3 шолја шеќер;
- 1/2 лажичка измешани мелени зачини (цимет, каранфилче, пимент, ѓумбир);
- 1/4 лажиче црвен пипер;
- 200 гр. ореви (половинки или покрупни парчиња).
Во тенџере ставете ги сите состојки освен оревите и мешајте ги на шпорет на средна температура, сè додека шеќерот не се растопи. Додајте ги оревите, зголемете ја температурата на ринглата и промешајте. Кога течноста во тенџерето ќе зоврие, мешајте без прекин 3 минути. Внимавајте оревите да бидат целосно прекриени со мешавината. Потоа, префрлете ги оревите во големо тавче врз хартија за печење и раздвојте ги со виљушка. Оставете ги сосем да се оладат, па складирајте ги во тегла или веднаш послужете ги.
Празнично чоколатце
- 130 гр. суви кајсии;
- 60 гр. ф’стаци;
- 450 гр. црно или млечно чоколадо;
- 100 гр. бело чоколадо.
Ф’стаците и сувите кајсии одлично си одговараат, но чоколатцето може да се направи по ваш вкус, односно, можете да додадете суви овошја по желба, како и лешници, бадеми или парчиња бисквити.
Исецкајте ги сувите кајсии, измешајте ги со ф’стаците, па распоредете ги рамномерно во тавче обложено со прозирна фолија. Доколку сакате танок слој на чоколадо, правете го во димензии 35 x 25 cm, а доколку сакате подебел слој, употребете помало тавче или повеќе чоколадо.
Растопете го црното чоколадо во тенџере и ставете го во друго тенџере наполнето со вода која полека врие. Мешајте додека не е скоро целосно растопено, па тргнете го од водата и мешајте да се растопи целосно. Потоа истурете го врз кајсиите и ф’стаците и рамномерно распоредете го. На ист начин растопете го и белото чоколадо, со лажички нанесете го врз црното чоколадо, па со стапче или нож направете шари по избор. Оставете го чоколатцето во фрижидер додека не се стврдне, па искршете го на парчиња и… грицкајте!
* рецептите во целост се преземени од ситно сецкано
