Научно објаснет патот на алкохолот низ организмот
Сите знаеме што значи кога некој е во алкохолизирана состојба, но дали знаете што точно се случува во организмот додека е под дејство на алкохол? Алкохолот е едноставен молекул, но неговите ефекти врз мозокот се доста сложени. Тој различно делува на секој поединец и во различни ситуации. И покрај тоа што консумирањето алкохол претставува субјективно искуство одредено од многу различни параметри, сепак научното објаснување за неговиот пат низ крвотокот е ист, различни се само ефектите.
Откако ќе стигне до крвотокот, алкохолот делува врз многу органи, а неговите ефекти се највидливи врз мозокот бидејќи тој е задолжен за однесувањето. Алкохолот делува како седатив на нервниот систем што значи дека ја успорува комуникацијата помеѓу мозочните клетки и останатите нерви. Тој делува како социјален поттикнувач, бидејќи го намалува функционирањето на лимбичкиот систем којшто е задолжен за емоции кои предизвикуваат вознемиреност и страв. Сето ова, накратко го објаснува вашето однесување кога пиете алкохол, односно причината зошто сте толку дружељубиви, опуштени и интересни во сабота навечер.
Патот на алкохолот низ телото
При консумирање, алкохолот најпрво оди во стомакот. Оттаму, преку крвта патува низ целото тело. Токму затоа, доколку се пие на празен стомак, тој побрзо се апсорбира во крвотокот, односно побрзо се постигнува алкохолизирана состојба. Втор стадиум, е кога телото се труди да го елиминира алкохолот преку мокрење, па затоа тогаш се почести посетите на тоалет и всушност тоа е причината за дехидрација. Кога алкохолот ќе стигне до мозокот, тогаш се постигнува алкохолизирана состојба и тоа според конкретен распоред.
Алкохолот и мозокот
Алкохолот го зафаќа церебралниот кортекс и затоа стануваме опуштени, а во исто време ги намалува когнитивните способности како што се донесување на одлуки и процесирање. Следно на што делува алкохолот е хипокампусот. Тој е одговорен за меморијата и емоциите. Под дејство на алкохол чувствата се интензивираат, па доколку сте оптимистични ќе се почувствувате многу среќни, а доколку сте нерасположени ќе чувствувате тага и депресија. Овој дел, исто така е задолжен и за делумни сеќавања, што значи дека случките не се забораваат, туку не се формираат соодветно. Потоа, алкохолот делува врз моторичките функции и координацијата, односно врз центарот за рамнотежа.
Доколку се продолжи со пиење, алкохолот стигнува до медулата или продолжениот мозок. Алармантно е која алкохолот стигнува до долниот заден дел на мозочното стебло, кој ги регулира најважните способности, меѓу кои и дишењето. Доколку овие важни способности се нарушат, ќе треба да се испразни стомакот. Продолжување со пиење во оваа состојба може да доведе до смрт.
Алкохолот и расположението
Колку повеќе се зголемува количината на алкохол, толку се зголемува неговото влијание врз мозокот. Следствено на тоа, се менува и расположението. Тоа е поттикнато од попримитивните делови на мозокот кои што имаат потенцијал да ја зголемат агресијата и сексуалниот нагон. Со намалувањето на моторичките функции, некои може да почувствуваат вртоглавици кои водат до несвесна состојба и повраќање. Ова секако се однесува на поголемите дози.
Значи доколку не сте расположени или сте депресивни, алкохолот само ќе го интензивира постоечкото чувство, но нема да го промени.
Дехидрацијата заедно со хипогликемија, пад на шеќерот во крвта, недостатокот на витамин Б12 и остатоци од токсините од преработката на алкохолот, сите заедно го прават мамурлакот неподнослив. Сега кога знаете точно кои се последиците од саботната вечер, кога легнувате да спиете во алкохолизирана состојба, понесете чаша вода со себе. Или подобро две. Најдобро, внимавајте со алкохолот и консумирајте одговорно.
