Начини и совети како да ја зголемите продуктивноста
Постојано работите но имате чувство дека ништо не постигнувате. Не правите пауза и пак не успевате да ги завршите тековните обврски. Или пак, вечно прокрастинирате бидејќи не уживате во тоа што треба да го сработите. Најпрвин, потрудете се да ги откриете причините за вашата состојба. Можеби сте изложени на преголем стрес или пак патите од АДХД за возрасни. Недостатокот на сон ви се одразува во постојан умор и слаба концентрација, или пак причините се посериозни како депресија и постојана вознемиреност. Бидејќи загубеното време не се враќа назад, на крај останувате со потрошена енергија и незавршени обврски. Затоа, ви нудиме неколку начини и предлози како да ја зголемите продуктивноста.
Бидете умерени
Постојаниот интензитет не значи зголемена продуктивност. Токму спротивното, ќе се истрошите и после тоа нема да можете да работите било што. Работете, но внимавајте задолжително да правите паузи. После 90 минути работа, се препорачува одмор 15-20 минути. Доколку го практикувате овој совет, работните задачи ќе ги завршувате побрзо и со поголема концентрација. Целта е да се стекне рутина со максимално користење на денот.
Обезбедете квалитетен сон
Потрудете се да спиете најмалку 7 часа секоја вечер. Спијте во исти временски интервали, односно обидете се да легнувате и да станувате во исто време. Престанете со пушењето, избегнувајте алкохол и кофеин неколку часови пред легнување, за да имате квалитетен сон, потребен за продуктивен и исполнет ден.
Преземете одговорност
Не ја префрлајте вината врз други и бидете искрени кон себеси. Доколку патите од некоја состојба или заболување, не го одлагајте барањето на стручна помош. Доколку сте препознале дека постојаното одложување ви прешло во навика, тогаш поделете ја работата на помали работни задачи на кои сами ќе си одредите краен рок. Извршувањето на обврските една по друга ќе ве направи позадоволни, а со тоа и попродуктивни.
Планирајте го слободното време
Ова најмногу се однесува на интеракцијата која ја правите во текот на денот, односно испланирајте го времето за социјални мрежи. Онлајн платформите ни даваат чувство на информираност за тековните случувања, но најчесто се губење на драгоцено време. Ограничете го времето предвидено за социјални медиуми, а доколку е потребно направете и мал распоред на активности.
Внесете промени во исхраната
Внесувате големи количини на кафе, калорична храна и енергетски напитоци со цел да обезбедите енергија потребна за дневните активности, но оваа рутина може да доведе до обратен ефект, односно до чувство на премореност. Започнете да ги планирате оброците и да ги поделите на неколку помали, со цел нивото на енергија постојано да се одржува.
Променете ги штетните навики
Ценете го своето време и започнете да правите свесни избори. Направете еден список во кој ќе ги наведете непотребните активности кои ви губат време и уште еден список во кој ќе ги напишете целите што сакате да ги постигнете. На тој начин подобро ќе се фокусирате и сосредоточите на важните обврски и нешта што ви значат во вашиот живот.
