Селфи фотографиите се новиот облик на комуникација
Живееме во време кога формата е поважна од содржината, а социјалните мрежи поважни од реалниот живот. Културата на живеење се состои од нешта кои брзо се консумираат без многу размислување. Оттука, недостатокот на критичко размислување доведува до една површност на постоењето. Сите овие нешта се индикатори заслужни зошто живееме во време на селфи културата, начин на комуникација која се издигна на ниво на културен феномен, како една цивилизациска придобивка која ја оставаме за нашите поколенија и ја впишуваме во историскиот код на нашето време.
Некои психолози овој начин на само претставување го прогласија за психичко нарушување, но трендот не запира, токму напротив, станува сè популарен. Бидејќи нема човек, особено млад човек кој не направил селфи, дали треба да заклучиме дека сме сите една психички нестабилно општество?
Познатиот актер, режисер и писател, Џејмс Франко – James Franco, тврди дека нема ништо лошо во селфи како начин на изразување, дека тоа за него претставува лесен и најбрз начин на комуникација. Тој нагласува дека селфи фотографијата го нуди она што сите го сакаат, внимание. „Вниманието е моќ“, нагласува тој во својата колумна. „Додека кај славните, селфи е најмоќниот псевдо-интимен момент, кај обичните луѓе тој е најефективниот начин да се покажат во најдобро светло.“, вели Франко.
Селфи фотографијата како само презентација е најбрз начин да покажеме кои сме и каква е нашата динамика на живеење. Всушност зад ова се крие психолошкиот концепт – како се гледаме самите не доаѓа од тоа какви сме навистина, туку од тоа што мислиме како другите нѐ гледаат. Накратко, нашиот идентитет го потврдуваме преку другите околу нас и тоа преку инстант визуелна комуникација. Можеби селфи презентирањето е позитивна активност во ова време на отуѓување, да се претставиме преку селфи, да излеземе од комфорната зона и да се прикажеме во најдобро можно светло.
Психолози од Универзитетот во Охајо утврдија дека оние кои секојдневно ставаат селфи фотографии покажуваат анти-социјално однесување, и имаат поголеми изгледи за психопатско однесување, тие се нарцисоидни, импулсивни и имаат недостаток на емпатија. Останатите негативни страни вклучуваат и нарушување на односите во реалниот живот, со преголемото споделување на информации и интимни моменти.
Сепак, и покрај сите истражувања и негативни мислења, селфи фотографијата е тренд во подем, културна придобивка која сѐ повеќе ќе биде застапена во нашите животи, сакале ние или не. Денес постојат мноштво социјални платформи за онлајн запознавање кои ја користат селфи фотографијата за да се претстават и да се промовираат на најнепосреден можен начин.
Познатите светски компании (особено оние од модната индустрија) веќе ја препознаа моќта на селфи фотографијата и наголемо се служат со неа на разни начини, креирајќи бројни интерактивни селфи апликации. Некои предвидуваат дури подалеку во иднината, кога селфи феноменот ќе служи за промоција на компаниите, ќе нуди персонализиран шопинг, како и изработка на софтвери кои користат селфи фотографии наместо бар кодови.
Во секој случај, селфи фотографијата е еден феномен кој е полн со контрадикторности.
И што е заклучокот? Најверојатно одговорот е во зачестеноста, односно колку често и за што се употребува овој начин на фотографирање. Значи, доколку сакате за овековечите момент кој не сакате да го заборавите, слободно направете едно селфи.
