Научна студија потврдува дека нема сигурни научни докази за здравствените придобивки од суровото (непастеризирано) млеко
Неодамнешната студија за ризиците и придобивките од пиење сирово млеко, објавена во изданието на Nutrition Today од месец јули/август, потврди дека сировото млеко воопшто не е здраво како што се смета и дека може да има само одреден плацебо ефект, поради високата цена на овој напиток од животинско потекло. Доктор Џон А. Лејси – John A. Lаcey кој е професор по науката за храна при Универзитетот Висконсин-Медисон, се обиде да ја прикаже реалната слика околу јавната расправа за можните здравствени придобивки од пиење на сирово млеко.
Според студијата, сировото млеко е честа причина на труење од храна.
Д-р Џон проучи повеќе од 50 научни статии и Веб страници од разни групи кои го поддржуваат консумирањето на сирово млеко, пред да дојде до заклучокот дека не постојат доволно издржани докази кои би потврдиле дека сировото млеко дава некакви здравствени или нутритивни придобивки, почнувајќи од исклучување на интолеранцијата кон лактоза, па сè до подоброто варење (дигестија).
Д-р Џон кој исто така е директор на центарот за истражување на млекото во Висконсин, истакнува дека тврдењата за здравствените придобивки од консумирање на сирово млеко се неосновани митови.
„Голем број на различни тврдења станаа популарни во врска со можните здравствени придобивки, кои хипотетички може да се изведат од потрошувачката на свежото сирово млеко“, пишува д-р Лејси во студијата. „Неодамнешните научни анализи од страна на разновидни меѓународни организации заклучија дека не постојат сигурни научни докази кои можат да ги поткрепат овие сугерирани здравствени придобивки“.
„За време на пастеризацијата, не постои значителна промена во нутритивниот квалитет на млекото“ – објаснува Д-р Џон Лејси.
Според Д-р Џон Лејси пастеризацијата на млекото не резултира со никакви разлики во квалитетот на протеините или минералите во млекото и дека загубите на витамини се многу мали. Истражувањето на Д-р Џон заклучува дека оние американски држави кои ја ограничиле продажбата на сирово млеко, се соочиле со помалку епидемии и болести поврзани со млечни производи.
Пастеризацијата на млекото како јавна мерка за безбедност, започнала во Чикаго во 1924 година, но била попречувана во следните осум години. Во тој временски период јавноста сфатила и го прифатила фактот дека „прочистеното млеко“ (пастеризираното) е побезбедно отколку „чистото млеко“ (сировото), а туберкулозата беше ставена под контрола.
Треба да имаме предвид дека многу од состојките што ги има во млекото, може всушност да се најдат и во многу други производи од природно и растително потекло, како на пример калциумот. Исто така, треба да имаме во знаење дека сировото млеко може да биде причина за појава на дијареа, а со тоа и до дехидратација на организмот. Од млечните производи, јогуртот со докажана сигурност е помеѓу најздравите, поради неговата способност да го олеснува варењето на храната во дигестивниот тракт, благодарение на добрите бактерии кои ги содржи.
