Метеопатијата е еден вид здравствен проблем кој се јавува под дејство на влијанието на метеоролошките фактори, меѓу кои промени на температурата, влажноста и воздушниот притисок, ветер, дожд, грмотевици. Сè повеќе сме сведоци на нагли климатски промени при кои температурата во текот на едно деноноќие се менува за над 10 степени што влијае не само кај повозрасните и лицата во поодминати години, туку се повеќе се одразува и помладите и лицата до 30 години. Најчесто страдаат жените, што покажуваат и светските статистики. Дури 30% од вкупната женска популација во светот страда од оваа појава. Лекарите велат дека метеопатијата полека но сигурно станува најчеста болест на модерниот живот. Симптомите кај метеопатите можат да се поделат во три групи:
- Психички: замор, нагли промени на расположението, намалена концентрација, апатија и нарушување на сонот, раздразливост, меланхолија;
- Физички: главоболка, мачнина, несвестица, вртоглавица, ревматски болки, болки во телото каде во минатото биле подложни на повреди;
- Срцеви тегоби: забразана работа на срцето, зголемување на крвниот притисок.
Симптомите обично се јавуваат од 24 до 48 часа пред драстичната промена на времето, а се одразени со слабост, депресивно расположение и болки во зглобовите и мускулите.
Постојат две групи на метеопати. Во првата се лицата кои немаат здравствени проблеми, а при промена на времето чуствуваат слабост и одредени болки во телото. Во втората група пак спаѓаат лицата кои имаат хронични заболувања, како што се дијабетичарите, луѓе со срцеви проблеми и со нарушен крвен притисок.
За полесно пребродување на наглите климатски промени, лекарите препорачуваат што повеќе од слободното време да се поминува на отворено и на чист воздух. Во текот на денот минимум да се пешачи по еден час. Да се вози велосипед и да се практикуваат спортски активности. Да се пијат чаеви и тоа: зелен чај, чај од камилица, нане и маточина. Еден од начините да се намалат последиците од временските промени е да се пие и поголема количина на вода. Во појадокот да преовладуваат житариците, ручекот да биде богат со зеленчук, а мрсната храна да се замени со риба. Треба да се конзумира и што повеќе овошје. Хронично болните треба секојдневно да ја следат биометеоролошката прогноза и редовно да ја земаат препишаната терапија. Доколку им се влоши здравствената состојба, веднаш да се јават на матичен лекар.
