Авокадо – овошје со магична моќ

Авокадото кое уште се нарекува и алигаторската круша, е тропско овошје за кое научниците велат дека има најголем нутритивен статус. Авокадото потекнува од Средна Америка и Мексико и го има во повеќе од 80 сорти, поделени во три групи: мексичко авокадо, гватемалско авокадо и западно индиско авокадо.

Авокадото во земјите од каде потекнува било нарекувано величествено, таму се сметало дека авокадото има магични моќи и затоа редовно било послужувано на кралските трпези, а принцезите морале да го консумираат бидејќи се сметало дека ја подмладува кожата и не дозволува нејзино сушење (легенди и преданија од времето на Астеките).

Нутритивни својства

Енергетската вредност на 100 грама свежо авокадо е 160 kcal или 670 kJ, од кои:

• 2 % протеини
• 8,53 % јаглехидрати
• 0,66 % шеќери
• 14,66 % масти

Од останатите овошја се издвојува поради големата содржина на минерали и олигоелементи: 1400 mg на 100 gr што од прилика е тројно повеќе од секое друго овошје. Меѓудругото 100 gr авокадо содржи 12 mg калциум, 0.55 mg железо, 7 mg натриум, 7 μg витамин А, 10 mg витамин Ц, 2.07 mg витамин Е, како и витамините Б1 и Б2, калиум, фосфор, магнезиум и незаситени масни киселини.

Авокадото и неговите лековити својства

За авокадото пред се мора да се нагласи дека е моќен чувар на срцето и крвните садови. Го регулира притисокот и работата на срцето, а има моќ и во намалување на нивоата на холестерол и триглицериди. Благодарејќи на многуте антиоксидансни материи кои се содржат во авокадото, тоа се наоѓа речиси на врвот на антиканцер намирниците, докажано влијае врз намалување на шансите за карцином на дојка и простата – велат нутриционистите. Авокадото било многу пати тестирано и сите резултати покажале дека тоа е мелем за простата и освен што двојно го намалува ризикот од карцином на простата, дава одлични ефкети при лекување на бенигна простатична хиперплазија – велат научниците. Авокадото има позитивен ефект скоро врз сите системи, но мораме да го издвоиме дигесивниот систем, бидејќи истражувањата покажале дека авокадото го подобрува варењето, формирањето на столицата, штити од карцином на дебело црево и хемороиди. Можеме да заклучиме дека после се она што го напишавме, авокадото навистина има кралска вредност за нашиот организам.

Авокадото во козметиката

Авокадото во голема мера се користи и во козмериката особено за заштита на кожата (оштетена, сува или зрела кожа), но истотака се користи и за сува и оштетена коса.

PharmaNEWS.mk ви предлага еднаш неделно да направите домашна маска од Авокадо на вашето лице. Маската за лицето од авокадо е неверојатен еликсир за вашата кожа бидејќи содржи многу минерали како што се железо, калиум, калциум, натриум, бакар, магнезиум итн. Авокадото исто така содржи витамини А, Е, Б и К. Како резултат на тоа маска за лице од авокадо стигнува до најдлабоките слоеви на епидермисот и и дава еластичност дури и на најсувата кожа.

Рецепта за домашна маска од Авокадо

Испасирајте го авокадото со вилушка или во блендер, растворете го медот во топлата вода и помешајте го со авокадото. Ставете ја маската на вашето лице користејќи ги вашите прсти или мека четка. Избегнувајте ги областите околу очите и устата. Маската оставете ја околу 10 минути, а потоа измијте го вашето лице.