Срцата кај мажите се разликуваат од срцата кај жените кога станува збор за процесот на стареење
Човечкиот организам е доста сложен и правилното функционирање на неговите одделни делови зависи од многу работи. Научниците секојдневно прават различни испитувања и истражувања за да потврдат веќе постоечки или пак да дадат нови објаснувања и заклучоци за работата на органите во човечкото тело. Како резултат на едно истражување се дошло до нов заклучок поврзан со начинот на стареење на срцето кај мажите и кај жените.
Според истражувачот Д-р Џон Енг – Dr. John Eng – од „Johns Hopkins University School of Medicine“ во Балтимор, срцата кај мажите и кај жените не стареат на истиот начин. Со текот на годините формата на срцето не останува иста. Таа се менува и кај мажите и кај жените, но не се менува на истиот начин. Срцата кај мажите всушност стануваат потешки, а количината на крв која може да ја соберат со текот на времето станува помала. Додека пак срцата кај жените не се однесуваат на ист начин. Тие не стануваат потешки со текот на времето.
Процесот на истражување траел прилично долго време. Истражувачите правеле долгорочни испитувања на околу 3000 луѓе кои немале срцеви заболувања. Првенствено, ги испитале срцата на луѓето преку магнетна резонанца. После 10 години, срцата на истите тие луѓе, учесници во ова истражување, биле повторно испитани преку магнетна резонанца, а резултатите од двете испитувања биле споредени. Возраста на учесниците за време на второто испитување се движела помеѓу 54 и 94 години.
Резултатите од овие испитувања покажале дека и кај мажите и кај жените имало намалување на обемот на левата комора на срцето, местото од каде се пумпа крв низ целото тело. Но, тоа што било поважно да се забележи бил фактот дека мускулната маса на левата комора кај мажите се зголемила, а кај жените малку се намалила. Според истражувачите, зголемувањето на мускулната маса може да се објасни на следниот начин. Ѕидовите на комората може да се задебелат затоа што се „напрегаат“ да пумпаат крв низ телото поради состојби како висок крвен притисок, прекумерна телесна тежина или други здравствени состојби. Ваквото задебелување на ѕидовите пак може да доведе до зголемена мускулна маса на комората.
Научниците додаваат дека неопходни се дополнителни испитувања за да се дознае повеќе за ваквите разлики кај мажите и жените кога е во прашање стареењето на срцето. А ако се земат во предвид досегашните резултати, можеби ќе бидат потребни различни видови на терапии за болести на срце кај мажи и кај жени.
