Болното грло е многу честа појава во ладните денови и најчесто не претставува сериозна закана за здравјето, но никако не треба да се запоставува
Раздразнето и болно грло е многу честа состојба за време на есента, најмногу како симптом на настинка и грип. Вирусите се причина за 85 до 95 проценти за болно грло кај возрасните и 70% кај децата на возраст од 5 до 16 години. Кога на ладното време ќе се додаде и загадениот воздух, најмногу страдаат дишните патишта. Во овој случај, прва борбена линија на организмот е грлото, па затоа болното грло не треба да се занемарува и секако, треба соодветно да се третира. Лечењето на болно грло опфаќа повеќе аспекти, започнувајќи од промена и внимавање на животните навики, промена во исхраната и зголемено консумирање на течности, поголем одмор, како и користење на средства со локално дејство.
Секако, најпрво треба да се одреди причината којашто довела до болно и воспалено грло. Болката во грлото може да биде индикатор на повеќе состојби: на штетни животни навики (пушење, пиење), предизвикана од вирус (грип, мононуклеоза, мали сипаници, заушки…) или бактерија (бактериски инфекции како streptococcus pyogenes), како последица на сув воздух во затворени простории, но и присуство на алергии.
Симптоми
Симптомите на болно грло се јасни, бидејќи воспалението на грлото се карактеризира со болка. Таа болка може да се влошува при голтање и зборување, грлото е суво, гласот може да биде зарипнат, отечени крајници или пак крајници со гној, како и отечени вратни жлезди. Овие симптоми имаат и пропратни симптоми како кивање, кашлање, треска, гадење, повраќање, главоболка и сл.
Воспалението пропратено со пецкање при голтање, црвенило и суво грло, може да го излечите сами.
Течности. Внесот на течности треба значително да се зголеми, бидејќи тие ја омекнуваат слузта и го олеснуваат дишењето. Исто така, може да правите и гаргара со солена вода.
Чај со мед и лимон. Корисноста на лимонот е добро позната. Заедно со медот, претставуваат моќна комбинација која го чисти грлото од наталожената слуз а медот ги спречува бактериите. Чај и лимон додадете во секој вид на чај, но најдобро е да консумирате природни чаеви бидејќи тие изобилуваат со антиоксиданси, го јакнат организмот и на тој начин штитат од воспаление.
Пилешка супа. Пилешката супа ќе ве стопли и ќе ја намали болката во градите со тоа што ќе ги ослободи дишните патишта. Имајте на ум дека супата што ќе ја купите од продавница го нема истиот ефект од онаа која сами ќе ја приготвите дома.
Спреј и пастили. Лечењето на болното грло се препорачува да се започне со препарати коишто ќе ги олеснат тегобите и симптомите. Тука во прв ред спаѓаат оние продукти како спреј и пастили кои се применуваат локално и имаат аналгетско и антимикробно дејство.
Аналгетско – за ублажување на болката, воспалението и надразнувањето во грлото а антимикробно – за да го спречи развојот и ширењето на најчестите предизвикувачи на инфекции во устата и грлото како бактерии, вируси (вирус на инфлуенца, херпес вирусот) и габички (Candida). Ваквите препарати се делотворни за чистење на слузницата од целиот спектар на микроорганизми. Пастилите се многу практични бидејќи го стимулираат производство на плунка со што грлото се навлажнува и на тој начин се олеснува голтањето а спрејот ја распрскува болката директно и делува веднаш.
Антибиотиците треба да се избегнуваат сè додека не се утврди присуство на бактериска инфекција. Така што, во никој случај не земајте антибиотици на своја рака.
Важна улога во лечењето на грлото има и одморот. Спијте најмалку осум часа, одржувајте ја хигиената на високо ниво, избегнувајте стрес, редовно проветрувајте и внимавајте воздухот во просторијата да ја има потребната влажност. Оптималната влажност е важна со цел слузницата на носот да не биде сува, односно да може соодветно да ја врши својата функција, односно, да го филтрира воздухот што го дишете.
Препорака кога да се посети лекар:
- Ако имате температура повисока од 38°C;
- Осип по кожата;
- Отежнато дишење;
- Болка во мускулите и зглобовите;
- Болка во увото.
