Потрагата по вакцина против маларија кај бремените жени од страна на група дански научници, откри неочекуван спореден ефект, кој претставува ефикасно оружје во борбата против рак
Во последно време научниците од целиот свет се обидуваат да пронајдат лекови за неизлечивите болести, како што е на пример СИДА, односно лекот и вакцината против ХИВ, но и за тешко победливата болест – ракот и други болести за кои до сега нема веродостоен лек. Постојат повеќе нови методи кои внесуваат надеж во лекувањето на канцерот и во убивање на канцерогените клетки, како што е на пример модифицираниот вирус на херпесот. Но, она што го одликува откритието на Данските научници од Универзитетот од Копенхаген – University of Copenhagen и од Универзитетот од Британска Колумбија – University of British Columbia е тоа што тие работеле врз откривање на вакцина против друга болест (маларија кај бремени жени) и случајно откриле потенцијален лек против ракот.
Потрагата по вакцина против маларија кај бремените жени откри дека „наоружаните“ протеини на маларијата го убиваат ракот. Во соработка со истражувачот на ракот Медс Догард – Mads Daugaard од Универзитетот во Британска Колумбија, Канада – истражувачот на маларија професорот Али Саланти – Ali Salanti од Факултетот за здравје и медицински науки откри дека јагленхидратот на коишто паразитот на маларијата се закачува во плацентата кај бремените жени е идентичен со јагленхидратот пронајден кај канцерогените клетки.
Во лабораторијата научниците создале протеин којшто паразитот на маларијата го користи за да се прицврсти кон плацентата и додале токсин. Комбинацијата од протеинот на маларијата и токсинот ги бара клетките на ракот, потоа се апсорбира, а токсинот се ослободува внатре, така што канцерогените клетки умираат. Овој процес бил забележан во клеточните култури и кај глувците со канцер. Ова откритие е опишано во реномираното научно списание Cancer Cell.
„Низ децении, научниците ги барале сличностите помеѓу растот на плацентата и туморот. Плацентата е орган, кој за само неколку месеци расте од само неколку клетки, во орган со просечна тежина од еден килограм. Плацентата на ембрионот му обезбедува кислород и хранливи материи во релативно туѓа средина. Туморите дејствуваат слично, бидејќи и тие растат агресивно во релативно туѓа средина“ – рече Али Саланти од Катедрата за имунологија и микробиологија од Универзитетот во Копенхаген.
„Ние ја испитавме функцијата на јагленхидратот. Во плацентата тој помага во обезбедувањето на брз раст. Нашите експерименти покажаа дека беше исто и со канцерогените тумори. Ние го искомбиниравме паразитот на маларијата со канцерогените клетки и паразитот реагираше на клетките на ракот како тие да беа плацента и тој се закачуваше кон нив“ – објасни Али.
Двете универзитетски научни групи истражувањето го спровеле на илјадници примероци од тумори на мозок, па се до леукемија и резултатите покажаа дека протеинот на маларијата е во состојба да нападне повеќе од 90% од сите видови на тумори. Овој лек е тестиран на глувци на коишто им биле имплантирани три типа на човечки тумори. Кај глувците со рак на простата, туморите исчезнале кај два од шест третирани глувци и тоа само еден месец по примањето на првата доза. Пет од шест глувци со метастатски рак на коски, лекувани со новата вакцина, преживеале по речиси осум недели, во споредба со контролната група, од која не преживеал ниту еден глушец.
„Објаснето со популарни термини, токсинот ќе мисли дека плацентата е тумор и ќе го убие, на ист начин како што ќе мисли дека туморот е плацента“ – истакна Али.
„Најлесното возможно тест сценарио е за четири години. Најголемите прашања се дали ова ќе функционира во човечкото тело и дали човечкото тело може да ги толерира потребните дози, без појава на несакани последици. Но, ние размислуваме оптимистички бидејќи протеинот се закачува само на јагленхидратите кои се наоѓаат во плацентата и во туморите кај луѓето“ – заклучува Али Саланти.
