herpes-protiv-rak
Споделете со пријателите!

Модифициран вирус на херпес се користи против меланом (рак на кожа) и го поттикнува имуниот систем на пациентот самостојно да се бори против ракот
Херпес симплекс е вирус што најчесто се манифестира на кожата во пределот на усните или гениталиите, кога имаме ослабен имунитет за време на настинките. Постои можност да се биде носител на овој вирус, а истиот никогаш да не покаже видливи симптоми на кожата. Како и да е, овој досаден вирус со своите непријатни заразни рани со големи проѕирни меури што болат и многу чешаат, сега има шанса да најде своја позитивна примена во медицината.

„Истражувањето било спроведено врз 436 пациенти со агресивен малиген меланом – најсмртоносниот тип на рак на кожа, од 64 центри ширум светот.“

Генетски модифицирана врста на вирусот Херпес, наречена T-Vec, може да ги уништи клетките на ракот и да ги спречи туморите од растење и зголемување, тврди најново научно истражување објавено во журналот за клиничка онкологија – Journal of Clinical Oncology. За разлика од хемотерапијата, која е толку токсична што ги уништува сите клетки во фаза на размножување и тие на канцерот, но и здравите клетки на другите ткива и органи – модифицираните вируси ги напаѓаат само клетките на ракот, па затоа се поефикасни во лекувањето на болеста, во продолжувањето на животот на пациентите. Научниците исто така, ја фалат оваа револуционерна метода, бидејќи го поттикнува имуниот систем на пациентот самостојно да се бори против ракот.

T-Vec e производ на биотехнолошката компанија Амген – Amgen и наједноставно кажано, создаден е со отстранување на генот од вирусот којшто го предизвикува херпесот, а со додавање на друг ген што го поттикнува имуниот систем, вели истражувачот Џејсон Чесли – Jason Chesney од Универзитетот во Луисвил – University of Louisvill. Всушност вирусот е модифициран на тој начин што од него се отстранети два клучни гена, наречени ICP34.5 и ICP47, за вирусот да биде безопасен за здравите клетки. И покрај ова вирусот сè уште ја има способноста да се реплицира во канцерогените клетки и да ги уништува. Т-Vec исто така е создаден на тој начин што го ослободува молекулот GM-CCSF, кој сериозно го поттикнува имунолошкиот систем.

Прочитајте:  Вселенските габи помагаат во медицинските откровенија

Истражувањето било спроведено врз 436 пациенти со агресивен малиген меланом – најсмртоносниот тип на рак на кожа, од 64 центри ширум светот. На пациентите им била инјектирана генетски модифицираната верзија на вирусот херпес симплекс Т-Vec. Кај 16% од испитаниците забележано е значително намалување на туморите во првата година. Научниците очекуваат овој третман да даде уште подобри резултати откако ќе се искомбинира со друг вид на имунотерапија.

„Вообичаено е да мислиме за вирусите дека се непријатели на човештвото, но токму нивната способност да ги инфицираат и убиваат специфичните човечки клетки, може да ги направи навистина ветувачки третмани за канцер“ – рече професорот Пол Воркман – Paul Workman, извршниот директор на институтот за истражување на канцерот.

„Резултатите покажуваат дека за многу пациенти Т-Vec дава долгорочна ремисија, а во некои случаи и целосно излекување… Јас сум голем поборник на концептот за употреба на вируси при лекувањето на рак“, вели пронаоѓачот Роберт Кофин – Robert Coffin, ко-автор на студијата.

Најчестите несакани последици кај пациентите забележани во текот на истражувањето биле заморот, гадењето и морниците. И покрај позитивните резултати, потребни се одобрувања од страна на Американската агенција за храна и лекови, како и од страна на Европската агенција за лекови, пред овој нов лек да биде пуштен во широка употреба.


Споделете со пријателите!