Музиката не само што расположува туку е и многу корисна за подобрување на бројни здравствени состојби
Боб Марли за дејството на музиката рекол дека кога таа ќе те погоди, не чувствуваш болка. Бројните истражувања поврзани со дејството на музиката врз здравјето, докажуваат дека не само што музиката има моќ да ја намали болката, туку таа делува лековито врз многу здравствени состојби. Музиката е најнепосредната уметност а воедно е една од ретките активности која што го активира целиот мозок. Таа влијае врз емоциите, а контролата на емоциите е есенцијална компонента за одржување на менталното здравје. Токму затоа омилената музика веднаш го подобрува расположението. Сепак, нејзиното дејство е многу поголемо.
Ги подобрува визуелните и вербалните вештини кај децата
Музичкото образование од најмала возраст го стимулира детскиот мозок на повеќе начини кои што овозможуваат подобри вербални, комуникациски и визуелни вештини.
Го зајакнува срцето и го намалува крвниот притисок
Музиката има значаен ефект врз многу биолошки процеси; ги намалува болката, пулсот и дишењето. Го зајакнува срцето, ослободува ендорфин во мозокот со што помага за подобрување на васкуларното здравје. На срцето не му е важен стилот и музичкиот правец, туку ритамот. Побрзиот ритам ги зголемува отчукувањата додека следствено на ова, бавниот ги намалува. Во периодот на паузи срцето и дишењето се нормализираат или достигнуваат оптимално ниво. Триесет минути слушање класична музика секој ден, може значително да го намали високиот крвен притисок.
Ослободува од болка во грбот
Едно истражување од Австрија, откри дека слушањето музика им помага на пациентите со хронични болки во грбот. Музиката делува на автономниот нервен систем, поточно на делот задолжен за контрола на крвниот притисок, биењето на срцето и функциите на мозокот. Исто така, таа делува и на лимбичкиот систем, односно делот на мозокот кој ги контролира чувствата и емоциите. Бавниот ритам ги намалува крвниот притисок, биењето на срцето и го забавува дишењето. Ова ја намалува напнатоста во мускулите на вратот, рамената, стомакот и грбот. Редовното слушање музика го релаксира целото тело физички и психички и со тоа му помага да ја намали или превенира болката во грбот.
„Моцарт ефект“
Постои теорија наречена „Моцарт ефект“, а воедно и истражување кое докажало дека познатата „Соната за пијано во Д мол“ ја намалува епилепсијата кај пациентите.
Го зголемува либидото
Музиката исполнува емотивно и може да го зголеми нивото на серотонин со што ја зголемува сексуалната желба кај мажите со низок тестостерон.
Ја намалува постоперативната болка и вознемиреност
Едно истражување потврдува дека слушањето музика има терапевтско дејство и ја намалува болката. Исто така, бидејќи ослободува од вознемиреност и стрес, музиката обезбедува и подобар сон кој придонесува за побрзо заздравување.
Помага при вежбањето
Слушањето музика додека вежбате може да ги подобри вашите резултати. Ја зголемува издржливоста и прави да заборавите од нелагодноста на физичката вежба. Се препорачува музика со побрз ритам за поголема енергија.
И пеењето е корисно за здравјето
Пеењето под туш освен тоа што е забавно, е корисно за здравјето. Освен слушањето музика, и пеењето има позитивен ефект врз здравјето. Едно истражување докажува дека пеењето ослободува од стрес, а музиката и пеењето се делотворни за мозочната активност кај постарите лица со Паркинсова болест. Исто така, пеењето го подобрува респираторното здравје.
