Децата и стресот поврзан со училиштето

Притисокот кој го чувствуваат децата кога станува збор за училиштните активности не треба да се занемарува

Стресот кај децата поврзан со училиштето и обврските кои тие ги имаат започнува прилично рано. Тие се соочуваат со притисокот од нивните родители и врсниците уште од мали нозе, а може да се каже дека ова е поврзано со природната потреба на луѓето да бидат најдобри. Но, психолозите велат дека стресот не е секогаш лош. Стресот е знак дека живееме и дека се бориме со пречките во животот, дека реагираме на предизвици, учиме нови работи и го одржуваме мозокот активен. Но, кога тој започнува да преминува некои граници, тогаш може да прерасне во проблем.

Одењето на училиште е стресно не само за децата туку и за родителите. На децата им треба некој да ги упатува и понекогаш да поставува некои граници доколку е тоа потребно, но овие работи понекогаш го попречуваат природниот процес на учење и ги ставаат децата под притисок. Наместо тоа, се препорачува да се поработи на внатрешната мотивација кај децата. Тие треба да учат, да напредуваат и да се чувствуваат горди на себе си. Во некои случаи, напредокот на децата е од особено значење за родителите, и тие не би се задоволиле со ништо друго освен со нивниот успех. Тоа може да биде особено стресно за децата.

Еве некои работи кои може да помогнат добриот стрес поврзан со училиштето да не прерасне во проблем врз кој треба дополнително да се работи:

• Дајте му на вашето дете стабилна домашна средина;
• Поставете ги домашните правила и обврски како и последиците од непочитување на правилата заедно со децата и држете се до нив;
• Поминувајте квалитетно време со своите деца;
• Комуницирајте со децата и кога тие ќе бидат непослушни или ќе направат некаков проблем ислушајте ги и обидете се да ги разберете нивните причини наместо да ги казните за непослушноста.

Овие работи ќе ви помогнат да развиете стабилна врска со своето дете. Училиштето и стресот поврзан со учењето е долг процес кој децата треба да го поминат во животот. Еден неуспех нема да го одреди понатамошниот живот на детето, па затоа преголемиот стрес е непотребен. Родителите треба да научат дека децата растат, прават грешки и дека иднината не може да се предвиди. Континуираниот притисок да се биде најдобар во нешто што се прави е излишен. Додека пак љубовта, поддршката и разбирањето од страна на родителите во било кое време се особено значајни за напредокот на детето.

Комуникацијата е непроценлива и им помага на децата да учат од своите грешки. Обезбедете место и време кога со вашето дете ќе разговарате за работите што му се случиле или проблемите со кои се соочува. Се препорачува да се направи баланс помеѓу поставувањето граници, комуникацијата за било каков проблем и казнувањето. Поставувањето граници е во ред, но не се препорачува претерано користење на казнените методи.

Училиштето, ситуацијата во домот и врсниците може многу да влијаат врз животот на детето и да резултираат со непотребен стрес. Затоа најдобро е да се знае како да се реагира за да се спречи стресот на најдобар можен начин за самото дете.