Континуираната физичка активност го одржува менталното здравје во зрелото доба
Постојат сè повеќе докази дека она што е добро за срцето, добро е и за умот. И со овој исказ мислиме во буквална смисла, а не во преносна. Новото истражување покажува дека оние кои што се занимаваат со физичка активност, имаат десет години помлад мозок од нивните врсници кои што не се занимаваат со никаква физичка активност.
„Нашето истражување покажа дека постарите луѓе, доколку континуирано вежбаат, подолго ќе ги задржат когнитивните способности“, истакна предводникот на студијата, д-р Клинтон Рајт – Dr. Clinton Wright од универзитетот во Мајами.
Активности како јога, пешачење и голф, не се сметаат како сериозна физичка активност, а воедно, треба да се започне со вежбање пред да се појават знаци на губење на меморијата, изјави тимот на Рајт за журналот „Неврологија“.
Ова истражување, не потврдува целосно дека вежбањето само по себе го намалува процесот на стареење на мозокот, бидејќи постојат и други можни причини зошто постарите лица кои што се физички активни остануваат ментално посилни. Така, се зедоа во обзир останати параметри: степен на образование, штетни навики и здравствени состојби како висок крвен притисок и дијабетес.
Резултатите се добиени врз основа на скоро 900 постари личности со просечна возраст од 71 години, кои што решавале тестови за меморија, внимание и останати ментални способности. Испитаниците ги повториле тестовите пет години подоцна. За време на првите тестови, на испитаниците им било извршено и скенирање со магнетна резонанца. Околу 10 проценти од нив, изјавиле дека редовно вежбаат вежби со среден и висок интензитет, односно активности како трчање, аеробик и вежби со истегнување.
Во периодот од пет години, оваа група покажала подобри резултати и подобри ментални способности отколку останатите кои се занимавале со слаба физичка активност или воопшто не вежбале.
Според добиените резултати, заклучокот е дека обична прошетка не е доволна за да го зачува менталното здравје за време на зрелото доба.
Друго истражување има покажано дека физичката активност го подобрува протокот на крв до мозокот и може да ги подобри врските помеѓу мозочните ќелии. Исто така, вежбањето помага да се контролираат васкуларните ризик фактори како висок крвен притисок, високо ниво на холестерол и дијабетес, истакнува д-р Рајт.
Д-р Езриел Корнел – Dr. Ezriel Kornel, неврохирург кој не бил дел од истражувањето, се сложи дека заклучоците од истражувањето можеби не докажуваат дека со вежбање ќе останете со бистар ум, но тоа сугерира дека вежбањето може да има големо влијание врз менталните функции на луѓето подоцна во животот.
„Веќе знаеме дека вежбањето е многу важно за кардиоваскуларното здравје“, вели Корнел. Доколку на ова се додаде добра мозочна активност во староста, тоа претставува голема мотивација луѓето да започнат да се занимаваат со физичка активност.
