Март е месец на подигнување на свеста за здравјето на бубрезите како многу битни органи во телото и како да ги превенираме бубрежните болести a 14 Март во светот е познат како “Светски ден на бубрезите”.
Според некои проценки, денес се смета дека бубрежните болести погодуваат над 850 милиони луѓе ширум светот. Статистиките покажуваат дека 1 од 10 возрасни има некоја форма на хронично заболување на бубрезите. Се предвидува дека до 2040 година хроничната бубрежна болест (CKD – Chronic Kidney Disease), ќе биде петта причина за смртност од некоја болест на годишно ниво во светот, а секоја година околу 2 милиони луѓе се на дијализа.
Во нашата држава, ситуацијата со бубрежни болести не се разликува многу од светските статистики, односно 1 од 10 возрасни или над 200.000 граѓани имаат некаква форма на бубрежно заболување. Пациенти кои се во краен 5 стадиум на болеста кога бубрезите престануваат да функционираат, мора да користат дијализа и такви се околу 1600 во 23 дијализни центри низ државата. Втората опција е трансплантација и во нашата држава до декември минатата година се извршени 500 трансплантации со доста висок успех и во ефикасноста и во преживувањето.
Дали знаете дека бубрезите ја филтрираат нашата крв по 25 пати во денот? Затоа е многу важно да знаете како да ги заштитите овие органи со форма на грав а големи колку тупаница за да ве служат што подолго и што подобро
Запознајте ги вашите бубрези
Без разлика на која возраст сте или дали имате или не некое бубрежно заболување, ако ги знаете основните работи за тоа како работат бубрезите, ќе можете да ја превенирате или да ја забавите прогресијата на бубрежните болести.
Научете за здравјето на вашите бубрези
Вашите бубрези служат за да произведуваат урина и да ги отстрануваат отпадните материи и вишокот течности од телото. Ако бубрезите имаат некој проблем, тогаш тие ќе работат со поголем интензитет само за да можат да ја извршуваат својата функција. Дури и ако е изгубена 60% од бубрежната функција, може да не се појават никакви симптоми. Затоа е важно да се преземаат навремени чекори како би се зачувало нивното здравје.
Бидете свесни за ризиците од бубрежни заболувања
Доколку имате дијабетес, висок крвен притисок, срцеви заболувања или семејна историја на бубрежни заболувања или сте над 65 години, разговарајте со вашиот матичен лекар за ризикот од добивање на некое бубрежно заболување. Вашиот матичен лекар ќе ви ги посочи испитувањата што треба да ги направите и врз основа на резултатите ќе ви препорача соодветна терапија.
Практикувајте животен стил што ќе го поддржува здравјето на бубрезите
Променете ги животните навики. Ова вклучува здрава, умерена и балансирана исхрана, физичка активност минимум 30 минути во денот, спиење 7-8 часа, престанок со пушење и ограничен внес на алкохол.
