Симптоми и дијагностика на уринарна инконтиненција

Уринарната инконтиненција влијае врз карактерот на пациентот, врз квалитетот на животот, како и врз социјалното однесување, односно повлекување, зголемена потреба од лична хигиена, депресија, намалување на професионалната продуктивност

Инконтиненцијата е неспособност за контрола на урината. Тое е неволно испуштање или водење на урината. Инконтиненцијата најчесто се јавува како резултат на ослабени мускули на карличното дно.

Најчестата причина за овој проблем е поради ослабено карлично дно коешто кај жените се јавува како резултат на вродена слабост на сврзното ткиво, прекумерна телесна тежина, менопауза, бременост и раѓање, почесто воспаление на мочниот меур.

Кај машката популација уринарната инконтиненција се јавува како резултат на хируршко отстранување на простатата (радикална простатектомија).

Овој проблем најчесто е поврзан со емоционални проблеми кај пациентите. Уринарната инконтиненција влијае врз карактерот на пациентот, врз квалитетот на животот како и врз социјалното однесување, односно повлекување, зголемена потреба од лична хигиена, депресија, намалување на професионалната продуктивност.

Постојат неколку видови на инконтиненција:

• Стрес инконтиненција;
• Ургентна инконтиненција;
• Обилна (преплавена) инконтиненција;
• Невропатска инконтинеција.

Стрес инконтиненција

Настанува како резултат на неконтролирано испуштање на урината под притисок (стрес) на интраабдоминалните мускули од кашлање, кивање, смеење, вежбање или подигање на тешки предмети. Настанува кога сфинктерот на мочниот меур е ослабен. Стрес инконтиненцијата често се јавува како резултат на радикална простатектомија поради оштетување на сфинктерот на мочниот меур и нервите кои се одговорни за неговата финкција.

Нормалната финкција на мочниот меур и контролата со мокрењето се регулираат по неколку недели или месеци од радикалната простатектомија.

Ургентна инконтиненција

Пациентите со овој вид инконтиненција имаат потреба од итно мокрење. Кај пациентите со овој тип инконтиненција мочниот меур станува пречуствителен и на мала количина на урина собрана во него и го растегнува.

Ургентната инконтиненција може да биде предизвикана од инфекција на уринарниот тракт, Паркинсонова болест, Алцхајмерова болест, мозочен удар, повреден и оштетен нервен систем. Поретко се јавува како резултат на радикална простатектомија.

Обилна (преплавена) инконтиненција

Проблемите кај овој вид инконтиненција настануваат како резултат на некоја присутна пречка како карцином на простата или лузна и стеснувања кои го блокираат или стеснуваат излезот на мочниот меур, па често пати имаат тешкотии со мокрењето кој вклучува напор или чувство на недоволно празнење. Дел од овие пречки можат да настанат како резултат на радикална простатектомија.

Невропатска инконтинеција

Настанува како резултат на невролошки оштетувања поради кои доаѓа до зголемување на рефлексијата на детрузорните мускули или намален тонус на сфинктерот, а нејчесто поради комбинација од двете состојби.

Д-р Димитар Стровјаноски, специјалист уролог