Пациентите кои имаат долгогодишна нефропатија имаат симптоми како слабост, повраќање, главоболки, болки во грбот, слаб апетит
Дијабетесот е водечка причина за болеста на бубрезите-нефропатија. Отприлика, една третина од луѓето со дијабетес развиваат нефропатија, а 20% од луѓето со дијабетес тип 1 имаат бубрежни проблеми. Едни од најчестите пациенти во одделите на дијализа се луѓето со дијабетес.
Во раната фаза не постојат симптоми кои би ги дефинирале бубрежните проблеми. Бубрежните проблеми почнуваат за отприлика 5-10 години од почетокот на болеста. Пациентите кои имаат долгогодишна нефропатија имаат симптоми како слабост, повраќање, главоболки, болки во грбот, слаб апетит. Во развојот на нефропатија има пет фази и тоа:
- Хиперфункција;
- Нормоалбуминурија;
- Микроалбуминурија;
- Манифестна нефропатија;
- Уремија.
Во секоја наредна фаза гломеруларната филтрациска рата – GFR се намалува.
Затоа е многу важно да се прават тестови на урина (микроалбоминурија) за да се откријат почетните фази. Натаму, треба да се проверат уреа, креатинин. Исто така, важна во дијагнозата е и ехотомографијата и компјутерската томографија.
Целта на третманот на нефропатијата е да се намали прогресијата и да се контролираат раните компликации. Главниот третман кога ќе се појави протеинурија се ACE инхибиторите кои обично го редуцираат нивото на протеинуријата и ја забавуваат прогресијата на дијабетичната нефропатија. Исто така, AR-блокерите помагаат во тоа.
Комбинираната терапија покажа голем бенефит во намалувањето на креатининот и задржувањето на GFR на високо ниво. Нивото на гликемија во крвта треба да биде контролирано. Медикаментите што вклучуваат контрола на гликемијата се орални хипогликемици и инсулин. Исто така, диетата и физичката активност можат да помогнат во одржување на нормогликемијата. Крвниот притисок треба да биде контролиран на ниво под 140/90. Инфекциите на уринарниот тракт треба да бидат третирани со антибиотици. Дијализата може да биде неопходна во последната фаза, а избор е и бубрежната трансплантација.
Прим. Д-р Златко Савоски, специјалист-интернист
