bubrezni-zaboluvanja-prepoznajte-gi-simptomite
Споделете со пријателите!

Ако знаеме да ги препознаеме симптомите кои ни укажуваат на оштетување или намалена функција на одреден орган во телото, што би се рекло, си го продолжуваме животниот век
Функцијата на органите во нашето тело може да биде нарушена под влијание на различни фактори. Органите може да се оштетат и да предизвикаат други здравствени проблеми. Затоа е важно да се запознаеме со нашето тело и да научиме да ги препознаваме некои од знаците кои не предупредуваат дека нешто не е во ред.

„Раното откривање на бубрежните заболувања е од особено значење, оштетувањата настанати на бубрезите најчесто се неповратни.“

Бубрезите се одговорни за филтрирање на крвта. Ако не работат правилно, тогаш крвта нема да се филтрира како што треба и штетните материи ќе се натрупуваат во нашето тело. Неправилната функција на бубрезите може да предизвика и други проблеми кои може да го нарушат нашето здравје. Потребно е да се знае дека високиот крвен притисок и дијабетесот се поврзани со бубрежните заболувања. Но, ако успееме да ги воочиме симптомите кои не предупредуваат дека би можело да се соочуваме со бубрежно заболување значително ќе си помогнеме.  

Промени при уринирање – Било какви промени или потешкотии при уринирање можат да бидат знак за неправилна функција на бубрезите. Промена на бојата и количината на урината се едни од првите знаци. Потешкотии и болка при уринирање вообичаено укажуваат на инфекции на уринарниот тракт, а доколку почувствувате болка во грбот, тоа може да е знак дека инфекцијата се проширила на бубрезите. Крв во урината не треба да се занемарува во никој случај. Препорачливо е да се обратите на лекар.

Прочитајте:  Зимата влијае врз здравјето на различни начини

Замор и отоци – Ако чувствувате слабост и голем замор тоа може да е знак за намалено лачење на хормонот еритропоетин со чија помош се формираат црвени крвни зрнца кои носат кислород до клетките. Намалениот број на црвени крвни зрнца значи и намален пренос на кислород до клетките, а тоа предизвикува слабост и голем замор. Кога бубрезите не ја извршуваат правилно својата функција како филтри на крвта, вишокот вода наместо да се исфрла се насобира во телото предизвикувајќи отоци во рацете, стапалата, глуждовите или лицето.

Осип на кожата, чешање, гадење и повраќање – Оштетените бубрези не ја филтрираат крвта правилно, па штетните материи се насобираат во крвта и можат да предизвикаат чешање и осип на кожата како и гадење и повраќање.

Лош здив и метален вкус во устата – Како резултат на бубрежно заболување може да се зголеми нивото на уреа во крвта, а тоа вообичаено предизвикува лош здив и метален вкус во устата.

Болка во грбот или слабините – Одредени проблеми со бубрезите може да предизвикаат болка во грбот или слабините. Ваквата болка најчесто е поврзана со камен во бубрегот, но може да е знак и за полицистичната бубрежна болест која е наследна и предизвикува бубрежни цисти. Хроничното воспаление на бешиката предизвикува хронична болка и непријатност.

Штетата која е направена на бубрезите најчесто е неповратна. Ако забележите некои од горенаведените симптоми кои може да укажуваат на одредени проблеми со бубрезите или уринарниот тракт обратете се на лекар. Раното откривање на бубрежните заболувања е од особено значење за целокупното здравје на човекот.


Споделете со пријателите!