Тие не штитат само од несакана бременост, туку и од многу други медицински состојби поврзани со репродуктивното здравје
Оралните контрацептиви се едни од најистражуваните лекови во историјата на медицината и едни од најупотребуваните и најсигурни методи на современа контрацепција. Контрацепцијата подразбира примена на една или повеќе методи со цел да се спречи забременување. Најчесто применувани методи за контрацепција се кондомот, орални контрацептиви, спирала, периодична апстиненција.
Оралните контрацептиви (ОК) се таблети кои се земаат дневно и се состојат од комбинација на хормони (естроген и прогестерон). Дадени во форма на пилули, функционираат така што ја попречуваат овулацијата, т.е. ослободувањето на зрела јајце клетка. Така, тие не штитат само од несакана бременост, туку и од многу други медицински состојби поврзани со репродуктивното здравје. Затоа, нивната употреба е многу широка, тие се терапија или дел од терапија за: акни, болки во градите, за олеснување на менструалните болки и регулација на менструалниот циклус, ендометриоза, превенција на ектопична бременост, оваријални цисти, хирзутизам, рак на ендометриум, ПМС, анемија итн.
Повеќето жени кои што користеле орални контрацептиви ќе потврдат дека често, оралните контрацептиви иако се многу корисни, тие тешко се поднесуваат: водат кон депресија, мачнина, нагли промени во расположение, нерегуларно крварење, подуеност како последица од задржување на течности а после долгогодишно користење, се смета дека постои зголемен ризик од развој на рак на града и рак на грло на матка.
Во јавноста постојат многу ставови, поткрепени од голем број истражувања за позитивните и негативните влијанија од земањето на контрацептиви. Ризици секако постојат, но треба да се одделат заблудите и застарените сфаќања – кои се последица од истражувањата на првите орални контрацептиви коишто биле многу штетни и воедно многу различни по состав од денешните – од фактите и истражувањата. Современите таблети, за разлика од порано, содржат многу ниски дози на хормони, па така не влијаат на нормалните физиолошки процеси во телото на жената.
Најновото истражување од Институтот „Каролинска“ од Стокхолм, открива дека „оралните контрацептиви ја намалуваат општата добросостојба кај здравите жени“.
Истражувањето е спроведено врз 340 здрави жени на возраст од 18 до 35 години, во период од три месеци, на кои по случаен избор им биле давани ОК или плацебо. Кај оние коишто примале ОК се забележало влошување на нивниот квалитет на живот, односно негативна промена на расположение, добросостојба, енергија и самоконтрола. Не биле забележани значајни зголемувања на симптомите на депресија. Студијата истакнува дека овие промени се мали, но со клиничка важност.
Особено во последно време, има многу нови истражувања. Едно истражување докажа дека хормоналната контрацепција, особено помеѓу адолесцентите се поврзува со подоцнежна употреба на антидепресиви и дијагноза на депресија. Друга студија, ги истражувала несаканите ефекти на ОК врз менталното здравје. Истражувачите од оваа студија, истакнуваат дека иако многу жени пријавиле кај своите гинеколози зголемена депресија, вознемиреност и панични напади за време на терапија со ОК, не биде сфатени сериозно од страна на лекарите.
