Интервју со Огнена Ристовска сопственик на агенцијата Momentum Inc., организаторот на единствениот настан поврзан за здравје, спорт и велнес во Македонија
Огнена Ристовска е на чело на агенцијата Momentum Inc., компанијата која се занимава со организација на настани, а нејзините почетоци се поврзани со организирање на настанот Health, Fitness & Wellness Expo, првиот настан од областа на фитнес и велнес индустријата, со цел да се промовира здрав и квалитетен животен стил. Нејзиниот поглед кон животот претпоставува живеење во сегашноста и максимално искористување на моментот – нејзин рецепт за успех на професионален и приватен план.
Како настана идејата за HFW Expo и зошто токму вашиот фокус на интерес е фитнес и велнес?
Како што често се случува, идејата за настанот беше поттикната од нашето лично интересирање за здравиот животен стил и тоа во повеќе области – дали е тоа здрава храна, фитнес и спорт, велнес – козметика, масажа, спа итн. Она што го забележавме во нашата околина, е дека сѐ повеќе луѓе се интересираат за истите работи како и ние, и дека постои еден навистина позитивен тренд кај нас на сѐ поголемо внимание на здравата исхрана, вежбањето и општо – грижата за себе. Веќе секој околу нас знае да сподели по некоја нова информација, совет или трик – дали било тоа некои нови здрави јатки, семки, сокови, рецепти или дисциплина и програма за вежбање, салон за козметика. Меѓутоа, луѓето сѐ уште најмногу се потпираат на совети и препораки од некој што слушнал или пробал нешто ново. И тоа е доста позитивно, но, сепак тоа најчесто не се стручни совети. Уште повеќе, секој организам е различен и има различни потреби, а ретко кој има време самиот да проба сѐ за што слушнал. Затоа, одлучивме да го направиме овој настан – каде ќе донесеме сѐ под еден покрив и на едно место. Со тоа, секој посетител има уникатна шанса да се консултира од прва рака со вистински професионалци од сите области, и да може сам да одлучи и одбере како ќе се храни, вежба, негува, и што од сите понудени опции ќе користи. Најважно, ова е интерактивен настан на кој посетителите ќе можат самите да пробаат одредени демонстрации и директно да се консултираат со стручни лица за да добијат најдобар совет и консултација.
Според вашите минатогодишни искуства, колку Македонците се заинтересирани за квалитетен начин на живот, и колку се информирани на полето на исхрана, вежбање и одржување на физичка кондиција и активност?
Како што споменав, постои еден навистина позитивен тренд кон сѐ поголемо интересирање како и практикување на здрави животни навики, што лично многу ме радува. Она што мислам дека ни недостасува и она што мислам дека сите заинтересирани имаат потреба од истото е професионален и стручен совет и едукација на сите овие теми. Како што трендот добива на популарност така растат и бројот на дисциплините, програмите за вежбање, исхрана, третмани, производи, сите со различни ветувања за вакви или онакви резултати. Точно е дека постојано се иновира на ова поле, па трендовите се менуваат, но често во оваа „маса“ на податоци и информации знаат да се инфилтрираат и нестручни понудувачи или неефикасни програми, производи и услуги. Уште повеќе, дури и кога станува збор за квалитетни програми, изборот и варијациите во самите програми како и во резултатите е навистина огромен, па логично е да ни биде потребна помош и насока во одбирање на вистинската програма за своето тело, потреба и животен стил.
Дали располагате со информација што или кој изложувач од вашата минатогодишна програма побуди најголем интерес кај посетителите?
Па лесно можам да кажам дека Sport Inn – единствениот официјален Spinning центар во Македонија привлече најмногу внимание со одлично уредениот простор, беспрекорно осмислени настапи т.е. тренинзи во програмата за кои се гледаше дека е вложено многу труд, како и понудата на квалитетен совет и информација. Голема раздвиженост се чувствуваше и во делот на фитнес и спорт, во велнес делот постојано имаше демонстрации на масажа и третмани за лице каде исто така интересот беше многу голем, кај учесниците од областа на здрава храна имаше многу што да се проба а и понесе дома :-). Па така би можела да кажам дека целата сала беше прилично раздвижена и дека посетителите подеднакво се информираа за секое поле.
Промовирате и се залагате за здрав животен стил. Што за вас претставува балансиран животен стил и дали можеби имате пронајдено свој личен рецепт за поздраво и поквалитетно живеење?
Често балансот е тешко да се постигне. Сепак, според мене токму тоа е клучот за поздраво и поквалитетно живеење. Често пребрзото темпо и натрупаните обврски нѐ истрошуваат и не дозволуваат да мислиме на многу што друго, но мојот личен рецепт – живеење во сегашноста и максимално искористување на моментот – кога се работи се работи, кога се вежба се вежба, кога се дружи со пријателите се прави токму тоа и се заборава на сѐ останато – односно 100% посветеност и уживање во активноста која ја правиме. Секако, со цврсто утврдени приоритети. Размислувањето за незавршените обврски, она што нѐ очекува утре на работа, колку време не сме се слушнале со блиските и сл. создаваат огромен непродуктивен стрес.
Минатиот месец го посетивте најголемиот и најважниот настан во светот на фитнес индустријата FIBO, кој се одржа во Келн. Дали вашата посета на овој настан резултираше со нови информации поврзани со актуелните светски трендови од областа на фитнес и велнес индустриите, кои ќе бидат преточени во свежи идеи на следниот HFW Expo?
Едно од најдобрите искуства до сега и вистинско отварање на перспективите во поглед на сите опфатени области како и на организација на еден ваков настан, секако во целосно поинакви димензии. FIBO е фантастичен настан каде изложуваа 725 интернационални изложувачи – најдобрите од најдобрите од целиот свет, на околу 138.000м2 површина. Можете да замислите во какво изобилие беа презентирани информации, иновации во сите овие области, а да не зборувам за програмата која сама по себе беше шоу од кое тешко се тргнува поглед. Ги охрабрувам читателите да прочитаат повеќе и да погледнат фотографии и видеа од настанот на нашиот блог, а да, токму тоа беше целта на посетата – да научиме повеќе за светските трендови и да се обидеме да понудиме еден уште поквалитетен настан кај нас. Инспирирани сме од многу нешта кои ги видовме таму па ќе се обидеме на посетителите во септември да им понудиме еден навистина одличен настан по светски критериуми.
Периодов започнавте со подготовките за второто издание на HFW Expo. Може ли да ни откриете нешто повеќе околу настанот, односно што ќе понудите оваа година?
Да, подготовките се во тек и пријавите за учество на настанот се отворени. Сите заинтересирани за на некој начин да се вклучат во проектот, можат да нѐ контактираат на е-маил. Повеќе околу програмата во овој момент навистина не би откривале, но ќе најавиме дека имаме многу и многу интересни идеи, па посетителите нека продолжат да нѐ следат на Facebook фан страницата и на веб страницата каде етапно ќе откриваме што сѐ ќе може да се види на второто, подобрено издание на Health, Fitness & Wellness Expo!
