Неколку совети како да се мотивирате да започнете со вежбање
Еден од најупотребуваните изговори, број еден прокрастинација е: „Почнувам од утре“. Оваа реченица многу често се поврзува со плановите кога треба да се почне со вежбање или воопшто, обид за некаква промена во секојдневниот живот. Обидите за било каква промена се тешки од причина што се почнува од нула. И тоа знае да обесхраби и демотивира. Не сте вежбале многу време и едноставно не знаете од каде па почнете, па цело време одложувате и покрај желбата за витко и здраво тело. Сепак, постојат неколку начини што ќе ве мотивираат да започнете со вежбање, и тоа уште денес:
Мали победи
Важно е да си поставте една важна, главна цел што ќе ве води. Желба за поотпорен организам и поздрав начин на живот, повитко тело или завршување на некоја фитнес програма до крај. Имајте на ум, дека поважно од одредувањето на целта е секојдневно да прогласувате мали победи. Зошто? Бидејќи на тој начин, со постојано поттикнување, ќе истраете во Вашата намера, На пример, речете си: „денес ќе истрчам додатно уште еден километар“. Откако ќе ја извршите целта што сте си ја задале за денес, Вие ќе се чувствувате охрабрено да продолжите понатаму.
Бидете реални
И не очекувајте резултати преку ноќ. Напорно вежбавте стомачни, но стомакот е сѐ уште опуштен. Уморени сте од трчање, а нозете не ви се затегнати. Телото не е чудотворец! Ако на Вашето тело му било потребно една година да акумулира толку масно ткиво, тоа не може да исчезне преку ноќ или со еднонеделно вежбање. За секоја промена потребен е труд. А секој труд се исплати бидејќи со него доаѓаат и резултатите.
Направете план
И држете се до него. Не се откажувајте од вежбањето и не го запоставувајте доколку ве викнат на кафе или на некоја друга активност. Секогаш испланирајте време за вежбање како што закажувате состанок. Вежбањето е средба со себеси со желба за подобрување на сопствената благосостојба. На вежбањето сметајте како посветено време за себе. Испланирајте го патот до целта со поставување на точни термини што нема да ги запоставувате. Бидете дисциплинирани и систематизирани.
Забавувајте се
Без оглед дали ќе трчате, ќе вежбате фитнес, пилатес, јога или ќе возите велосипед, потрудете се да се забавувате додека го правите тоа. Во спротивно, вежбањето ќе ви стане мачна обврска од која кога-тогаш ќе сакате да избегате. Ако ви е забавно тоа што ќе го правите, нема да чувствувате голем напор и многу е веројатно да стигнете до посакуваната цел. Од голема помош е да најдете партнер за вежбање со кој заедно ќе се поддржувате и мотивирате.
