Некогаш стресот може да биде предизвикан од навидум среќни случки и позитивно однесување
Стресот е дел од секојдневниот живот и од него не може да се избега, па затоа треба да се прифати како составен дел од живеењето. Тоа се постигнува со соочување со причините што го предизвикуваат и нивно минимализирање. Свесни сме за стресот како и за причините што го предизвикуваат: недостаток на пари, крајни рокови на работа, невработеност, лош сообраќај. Овие се некои од очигледните причини, но постојат и мноштво други кои што на прв поглед е потешко да се забележат. Стресот напаѓа тогаш кога зададените обврски и планови не можат да се реализираат.
„Постојат многу пречки и мали предизвици кои што не изгледаат големи отпочеток, но се зголемуваат со тек на време“, вели Скот Шиман – Scott Schieman професор по социологија на универзитетот во Торонто.
Доколку научите да ги препознаете, ќе бидете подготвени да се соочите со нив и да ги отстраните од можни причини кои што го зголемуваат стресот. Некои од нив не изгледаат како негативни и токму затоа изненадуваат.
Постојано велите ДА
Позитивниот став кон животот е добра и посакувана особина, но често може да предизвика стрес. Ви се случило да излезете на состанок со личност со која знаете дека не си одговарате, но полесно ви е да излезете отколку да ја одбиете? Или пак, го чувате кучето на вашиот пријател иако не сте љубител на животни? Доколку имате проблем да поставите лични граници и да кажете НЕ, големи се шансите дека сте под стрес и постојано да сте вознемирени. Стресот произлегува од стравот да не ги изневерите оние околу вас или од чувството на вина во врска со нецелосно исполнување на дадена задача.
Нереално големи очекувања
Доколку мислите дека имате голем потенцијал и сте многу амбициозни, исто така треба да знаете дека секогаш постои и потенцијалот сè да тргне наопаку без оглед на вашиот труд. Обидот да се биде перфекционист е добар, тој е одлика на одговорност, но и голем извор на стрес. Добро е постојано да ги докажувате своите способности и да живеете со полна пареа, но однесувањето на „супер човек“ кој е подобар од другите, знае да предизвика многу стресно чувство.
Окупираност со себеси
Излегувате од дома со чувство дека се наоѓате под огромна лупа и сите внимателно го следат секој ваш чекор? Вистината е дека луѓето околу вас не придаваат толкаво значење на вас колку што вие мислите. И тоа од едноставна причина. И самите се окупирани со себе. Луѓето најчесто си придаваат преголема важност и таа окупираност со себе ги доведува до несигурност. Ова однесување претставува извор на голем стрес, бидејќи постојаната грижа дали сте социјално прифатливи, знае да истошти.
Големи (позитивни) животни промени
Нова работа, нова врска, стапување во брак, вселување во нов стан, пензионирање – сите овие промени го носат предзнакот позитивни. Но, и покрај тоа што носат првично чувство на среќа, всушност се голем извор на стрес. Тоа е така, бидејќи и за позитивните промени потребни се прилагодувања, а прилагодувањата значат стресни ситуации и многу енергија.
