Здравјето на бубрезите е есенцијално не само поради тоа што тие ги филтрираат течностите и отровите од нашиот систем, туку и поради тоа што произведуваат важни хормони и ги регулираат електролитите
Бубрезите заедно со надбубрежните жлезди произведуваат многу важни хормони за балансиран организам. Тие произведуваат хормон наречен еритропоетин, што е одговорен за стимулација на коскената срцевина да создава црвени крвни клетки. Бубрезите исто така произведуваат ренин, хормон што помага во регулирањето на крвниот притисок, но и калцитриол – хормон одговорен за способноста да апсорбираме калциум од храната што ја јадеме. Покрај ова, бубрезите помагаат во регулирањето на нивоата на електролити по пат на филтрирање на вишокот на минерали што пловат во крвта, додека вишокот на течности се исфрла преку урината. Бубрежните заболувања се појавуваат поради повеќе причини, а д-р Бен Ким од Канада го препорачува следново:
Не ги преоптоварувајте бубрезите со течности
Иако водата е неопходна за нормално функционирање, не се форсирајте да испиете две литри вода дневно, само заради тоа што таа е препорачаната дневна количина и покрај тоа што не сте толку жедни. Водете се и според тоа колку се потите, затоа што кожата има до некаде слична функција како бубрезите во поглед на исфрлањето течности. Ако јадете многу солена храна, потребно е да пиете повеќе течности, затоа што солта ја задржува водата во телото, а како симптоми се јавуваат отоци на нозете. Доколку консумирате течна храна или повеќе зеленчук и овошје, со самото тоа внесувате одредена количина и на течности. Филтрацијата на непотребните течности ги преоптоварува малите крвни садови во бубрезите, што може да доведе до појава на хронична болест кај бубрезите.
Не јадете премногу протеини
Водата не е единствената течност што ги оптоварува бубрезите. „Јадењето протеини повеќе отколку што ни е потребно, доведува до поголемо оптоварување на бубрезите. Ова може да доведе до прерано откажување на филтрацискиот механизам во нив“ – вели д-р Ким. Тој исто така истакнува дека ова не е многу дискутирано од страна на поборниците на високопротеинските диети. Покрај тоа што треба да се избегнуваат што е можно повеќе простите јаглехидрати (шеќер и засладувачи) за да се одржи нивото на инсулин и шеќер во крвта на нормално ниво, високопротеинската диета на долг рок претставува ризик за целокупното здравје, не само за бубрезите, особено кога повеќето од протеините се зготвени.
Д-р Бен препорачува повеќе сурова храна, јадење на доста храна богата со квалитетни масти, средни количества на здрави протеини и помалку зеленчуци со скроб. Ова не значи дека од слепото следење на Low carb диетата треба да се префрлите на сосем спротивното, односно на High fat диетата. За избалансираност на бубрезите, храната треба да биде исто така избалансирана, односно некаде помеѓу овие два начини на исхрана. Бидете умерени.
Не земајте секакви апчиња против болки
Лековите против болки што може да се купат без лекарски рецепт како ибупрофените, аспирините и други, се познати по тоа што ги оштетуваат бубрезите, доколку се земаат често и во големи количини. Луѓето со здрави бубрези немаат причина за грижа, доколку ваквите лекови ги земаат ретко и тоа само во итни случаи. „Многу од професионалните спортисти изминативе години откриле дека користењето на препишаните антивоспалителни лекови против болки како Vioxx, Indocin и Naprosyn претставуваат поголема опасност за здравјето на бубрезите отколку лековите против болки без рецепт“ – додава д-р Бен.
