Доколку страдате од некој симптом на хормонален дисбаланс, имате болни менструации или биполарно расположение, може да се обидете да си помогнете себеси со помош соодветна диета со авокадо
Фактот што повеќето од жените поминуваат низ хормонално лудило, ужасни болки и неодолива желба за чоколадо за време на црвените денови во месецот, не значи дека тоа мора така да биде и дека тоа е нормално, смета Кет Гал – Kat Gal, холистички тренер за здравје и среќа.„Менструациите не треба да бидат ужасен период, туку природна и речиси безболна појава во вашето тело“ – додава Кет.
Кога болките излегуваат од границите на нормалата, кога се појавуваат екстремни промени во расположението или пак, неодолива желба за конкретна храна или за храна воопшто во „женскиот“ период од месецот, ова може да се знаци за хормонален дисбаланс во вашето тело. Нерегуларностите во циклусот: прескокнувањето на месечниот циклус, нерегуларностите, преголемата зачестеност, преобилните крвавења или пак, преслабите крвавења, исто така може да означуваат предупредувачки знаци. Сепак, манифестацијата на менструалниот циклус не е единствениот начин со кој организмот сака да ви каже дека можеби постои нарушување на хормонално ниво.
Доколку чувствувате: умор, промена во телесната тежина (зголемување/намалување) без јасна причина, недостаток на либидо и желба за секс, биполарно расположение, невообичаена желба за храна, абнормални менструации (болни, пречести, прескокнување, обилни и сл.), паѓање на косата, истоштеност, депресија, анксиозност, неплодност – пожелно е да ги испитате своите хормони за да проверите дали патите од хормонален дисбаланс и секако за да ја откриете и потенцијалната причина доколку е тоа така. Кога имате хормонален дисбаланс вашиот матичен лекар најпрво ќе ве упати на преглед на тироидната жлезда којашто е регулатор на нашиот организам и производството на хормоните.
На кој начин авокадото помага во спречувањето на хормонален дисбаланс?
Есенцијалните масти се круцијален материјал за продукцијата на хормоните. Токму затоа јадењето на разновидни прехранбени производи богати со масни киселини со краток, среден или продолжен синџир, претставува есенцијален чекор за одржувањето на хормоните во баланс.
Она што е најважно да се знае за авокадото, е фактот што содржи растителни стероли, како што е beta-sitosterol, коишто се познати по своите антиестрогени својства. Со блокирањето на рецепторите за естроген во клетките, овие состојки ги редуцираат стапките на апсорпција на овој хормон. Овие растителни стероли го зголемуваат нивото на прогестерон кај жените и нивото на тестостерон кај мажите.
Балансирајќи ги хормоните естроген, прогестерон и тестостерон, авокадото може да ви помогне во поттикнувањето на сексуалната желба, може да ви помогне да функционирате со полна пареа и да ја задржувате мускулната маса, без разлика на полот.
Авокадото има уште многу други здравствени придобивки и овој зелен јајцевиден плод можете да го приготвувате на разновидни начини, во зависност од вашите желби и креативност во кујната, како на пример во салати, смудиа, сендвичи, сладоледи, слатки, сосови итн. Исто така, треба да знаете дека постојат многу други едноставни алтернативни начини за стабилизирање на хормоните, коишто можат да бидат основна или споредна помош за време на лекувањето, а со кои можете брзо и едноставно барем привремено да си олесните и да ги намалите симптомите.
