Преголемата изложеност на сончевите зраци и екстремно високите температури за време на летото, особено за време на зголемен физички напор се штетни па дури и смртоносни. Следете ги следниве седум точки, за да спречите топлотен удар поради летните тренинзи
Сончевото и топло време има многу позитивни страни. Сончевите зраци го активираат витаминот Д во кожата. Овој витамин ја зголемува можноста за зачнување. „Сончевото време го стимулира хормонот мелатонин и го зголемува нивото на витаминот Д во нашиот организам. Мелатонинот влијае врз репродуктивниот циклус, додека пак витаминот Д има влијание врз квалитетот на јајце клетките. Токму ваквото стимулирање на мелатонинот и витаминот Д во нашиот организам под влијание на убавите временски услови може да е главната причина за зголемените шанси за зачнување на бебе“ според Д-р. Вандекеркхов. Сепак сончевото време и екстремно високите температури, потоа преголемата изложеност на сончевите зраци, особено за време на зголемен физички напор се штетни па дури и смртоносни. Следете ги следниве седум точки, за да спречите топлотен удар поради летните тренинзи.
Телото се лади преку потење
Ладењето е отежнато за време на влажните временски услови, бидејќи потта побавно испарува од кожата. Отчукувањето на срцето се забрзува како што телото прави напори за да се олади. Кога надвор температурите се над 40ºС, тогаш дури и лесните вежби се претворуваат во огромен физички напор и опасност дури и од смрт. Доколку системот за регулација на телесната температура е преоптеретен, изложени сте на ризик од развој на болести поврзани со топлината. За да не се случи тоа, најдобро е да превземете заштитни мерки за вежбање во екстремните горештини.
Следете ја временската прогноза
Пред да ги заврзете врвките на спортските обувки, погледнете го извештајот за временска прогноза. Доколку температурата е висока, без облачност и со висока влажност на воздухот, најдобро би било да го одложите тренингот за подоцнежните часови. Интензитетот кој е нормален за умерен ден, може да биде опасен за време на интензивно топло и влажно попладне. Исто така треба да знаеме од кои видови на сончеви зраци најмногу треба да се заштитуваме и на кој начин.
Почитувајте го своето тело и сопствените граници
Луѓето кои се прекумерно дебели, лицата во години, децата, бремените и оние кои што не се навикнати на ригорозни вежби, треба да бидат крајно претпазливи во топлото време.
Планирајте го времето за тренинг според временските услови.
Облекувајте се соодветно
Независно од стилот на облекување, поради етничката и верска припадност, кога се вежба за време на големи жештини, многу е важно дали сте соодветно облечени. Светлите бои и материјалите кои што ја впиваат потта се најсоодветни за жешко време. Темните, тешки алишта може да направат да ви биде уште пожешко, бидејќи впиваат повеќе топлина. Заштитната опрема, како штитници и кациги, исто така создаваат дополнително загревање и ја зголемуваат телесната температура.
Сончевите изгореници влијаат на терморегулацијата
Изгорениците на кожата предизвикани од сонцето, ја намалуваат способноста на телото да се лади. Носете заштитни очила кои заштитуваат од UV зраците и не заборавајте на кремите за заштита од сонце со голем заштитен фактор. Кремата нанесувајте ја минимум половина час пред изложеноста на сонце, а потоа продолжете со нанесување следејќи го упатството.
Олеснете го тренингот
Доколку морате да вежбате во најжешкиот период од денот, тогаш препорачливо е временски да го скратите тренингот, но и да го намалите интензитетот.
Соодветна хидратација
На жешко време не само што е потребна хидратација на телото од надвор (со нанесување на хидратантни хреми после изложеноста на сонце), туку потребна е соодветна хидратација на секоја клетка од телото. Надокнадувањето на испотените и испарени течности од организмот најлесно е со консумирање на течна храна и повеќе течности, но и овошја и зеленчуци богати со вода, како лубеници, дињи, цитруси, краставици, домати и сл, но и јогурт.
При изборот на пијалаци за време на горештините препорачливо е да се одбираат пијалаците без додаден шеќер, а најдобро тоа да е минерална вода.
Водата е најсоодветен избор за хидратација, бидејќи лесно поминува низ дигестивниот тракт се до ткивата, а после интензивен над еден-часовен тренинг, пожелно е и да се напиете соодветен спортски пијалак за на телото да му се даде повеќе енергија и побрза хидратација и надокнадување на изгубените минерали.
Доколку ви е досадно да пиете обична вода, а внимавате на своето здравје, може да си направите вкусна и освежителна овошна вода или пак, вода која го поттикнува слабеењето. Експертите препорачуваат исто така и да не се претерува со флашираната вода.
