Проблемот со холестеролот никогаш не бил во тоа што темата е медиумски неинтересна (таквите приказни сами се раскажуваат), туку во тоа што е премногу поедноставено прераскажана. Во најчесто користената верзија ги имаме „добриот“ и „лошиот“ холестерол, што потоа се развива како ТВ-сапуница во која good guy го спасува нашето срце, додека bad guy се обидува да го затне од чиста пакост. Но, реалноста е, како и обично, многу помалку црно-бела, а од биохемиски агол и значително поинтересна.
