Дали куркумата наоѓа примена во вашата кујна?
Куркумата е повеќегодишно растение од семејството ѓумбири со карактеристична жолто-златна боја коешто уште многу одамна наоѓа примена во Индија и други делови на Азија и Африка. Всушност употребата на куркумата за здравствени и други цели датира скоро од пред 4.000 години.
Во традиционалната кинеска медицина, куркумата се користела за да помогне во варењето на храната, да ја подобри функцијата на црниот дроб, да ја намали болката од артритис и да ја регулира менструацијата. Куркумата, исто така, се применувала за третирање на егзема и рани.
Денеска овој зачин може да се најде во различни форми и како додаток во различни производи во маркетите и продавниците за здрава храна – од крекери и млеко со куркума до додатоци за чај и преливи за салати.
Но неодамна се постави прашањето дали ова жолто-златесто растение навистина е лек за сите гореспоменати медицински состојби?
Многумина сè уште веруваат дека состојките содржани во куркумата имаат својства што може да помогнат за третирање на состојби како што се артритис, Алцхајмерова болест, гастроинтестинални нарушувања, кожни и автоимуни болести, па дури и рак. Всушност, станува збор за состојките коишто се нарекуваат куркуминоиди, а најактивната од нив – куркумин. Тоа е состојка што се поврзува со моќни антиинфламаторни и антиоксидантни својства. Куркуминот се смета дека влијае позитивно на работната меморија, кардиоваскуларното здравје и дека го намалува физичкиот замор.
Сепак, во 2017 година, еден научен труд го стави златниот ореол на куркумата под знак прашалник. Трудот во којшто предмет на истражување бил куркуминот е објавен во „Review of Medicinal Chemistry“. Во него се тврди дека, и покрај досегашните илјадници студии, не постојат доволно плацебо-контролирани клинички испитувања (стандард на медицинските истражувања) коишто го поддржуваат широкиот спектар на тврдења за здравствените придобивки од куркумата. Неодамнешните клинички испитувања и епидемиолошките студии за куркуминот, исто така, имале неконзистентни наоди или грешки во извештаите, како и конфликти на интереси. Според авторите на трудот, еден од проблемите со куркумата за медицинска употреба е ограничената способност на човековото тело да го апсорбира зачинот. Оттука, некои експерти препорачуваат употреба на црн пипер заедно со куркумата бидејќи тој помага за полесна апсорпција на куркумата од дигестивниот систем во крвотокот. Имено денеска постојат многу додатоци со куркума коишто содржат и црн пипер бидејќи тој ја зголемува биорасположивоста на куркумата.
Авторите на научниот труд велат дека се потребни дополнителни истражувања за да се открие дали овој зачин има лековити својства. Група истражувачи од Националниот центар за комплементарно и интегративно здравје, пак, велат дека иако малку студии ги потврдуваат придобивките од куркумата, исто така, малку и ги побиваат истите со што сè уште останува прашањето дали овој зачин има лековите својства како што многумина веруваат.
