Заштитите се од вирусен гастроентеритис

Дознајте повеќе за вирусниот гастроентеритис, кои се симптомите, како се пренесува и како се лечи и превенира 

Вирусниот гастроентеритис е честа инфекција на желудникот и цревата која се карактеризира со повраќање и дијареа. Инфекцијата може да ја предизвикаат повеќе различни вируси, на пример, вирусите Ротавирус и Норовирус (претходно познат како вирус кој личи на Норвок вирусот). Постојат многу други причинители на гастроентеритис вклучувајќи бактерии, токсини, паразити и некои болести кои не се заразни.

Кои се симптомите?

Главни симптоми на вирусен гастроентеритис се повраќање и дијареа. Другите симптоми може да вклучуваат гадење, покачена температура, стомачни болки, главоболка и болки во мускулите. После тоа може да дојде до дехидрирање. Симптомите може да се развиваат од еден до три дена и обично траат меѓу еден и два дена, понекогаш подолго.

Како се пренесува инфекцијата?

Вирусниот гастроентеритис е многу заразен и се пренесува преку повратен материјал или измет од заразеното лице со:

• личен контакт, на пример, ракување со лице кое било болно и го носи вирусот на рацете;
• заразени предмети;
• заразена храна или пијалок.

Инфекцијата исто така може да се пренесе преку честички во воздухот кога луѓето повраќаат. Во повеќето случаи, болеста ја пренесува лице кое има симптоми. Некои лица може да им ја пренесат инфекцијата на други без да имаат симптоми, посебно во првите 48 часа откако оздравеле.

Како се спречува болеста?

Треба најмалку 10 секунди темелно да ги миете рацете со сапун и проточна вода (од чешма) и потоа да ги избришете со чиста крпа за бришење после користење на тоалетот, менување на пелени и пред јадење или приготвување на храна.

Како се поставува дијагноза?

Дијагнозата на вирусниот гастроентеритис обично се поставува врз основа на симптомите кои ги има лицето. При епидемија на болеста важно е таа да се потврди со позитивни лабораториски резултати и тоа вклучува проверка на примероци на измет.

Како се лекува болеста?

Вирусниот гастроентеритис не се лекува на некој посебен начин освен со одмор и обилно пиење на течности. Повеќето луѓе оздравуваат без да имаат некакви компликации. Меѓутоа, вирусниот гастритис може да биде сериозен кај лицата кои имаат тешкотии со надоместување на течностите и солта што ги изгубиле со повраќање и дијареа.

Лицата кои повраќаат или имаат дијареа треба:

• Да се одмараат дома и да не одат на работа, училиште или во детска градинка додека се болни;
• Да не приготвуваат храна за други или да негуваат пациенти, деца или стари лица. Овие мерки на претпазливост треба да продолжат да се запазуваат 48 часа откако ќе престане дијареата или повраќањето;
• Ова се однесува на луѓе кои приготвуваат храна во нивниот дом или кои работат во прехрамбената индустрија;
• 10 секунди темелно да ги мијат рацете со сапун и протечна вода (од чешма) после користење на тоалетот;
• Обилно да пијат бистри течности, на пример, разводнет сок или газиран пијалок – 1 дел со 4 делови вода, за да спречи дехидрирање (губење течности). Избегнувајте неразводнети сокови или газирани пијалоци затоа што тие може да ги зголемат дехидрацијата и диајреата. Во аптека може да се купат пијалоци за надоместување на изгубени течности и соли. Во сериозни случаи на дехидрација можеби ќе биде потребно интравенозно надоместување на течностите.

Од лекови можат да се користат адсорбенси (диосмектит, медицински јаглен) во комбинација со пробиотици.