dali-znaete-se-za-kremovite-so-zastiten-faktor
Споделете со пријателите!

Кремовите со заштитен фактор се дел од задолжителната заштита од сонцето во летните денови
„Заштитниот фактор во производите нè заштитува од штетното влијание на сонцето.“
Летните горештини се веќе секојдневие. Заштитата од сонцето треба да ни е на прво место ако сакаме правилно да се заштитиме од УВ зрачењето. Штетата која може да настане како резултат на неправилното изложување на сонце може да биде фатална за нашето здравје. Како дел од многубројните начини за заштита од УВ зраците се користат и кремовите со заштитен фактор кои се нанесуваат директно на кожата. Освен кремови, постојат и лосиони, масла, спреови, гелови, балсами за усни, итн. со заштитен фактор. Козметиката исто така може да содржи заштитен фактор. Заштитниот фактор во производите нè заштитува од штетното влијание на сонцето. Но сепак, користењето на производи со заштитен фактор не може целосно да ги блокира УВ зраците. Затоа е потребна дополнителна заштита од сонцето како лесна облека, капа, очила за сонце, сенка, итн. И луѓето со светла и луѓето со темна боја на кожа треба да користат заштитен фактор за да можат да се спречат можните оштетувања на кожата, вклучувајќи го и ракот на кожата. Еве и некои други интересни факти за производите со заштитен фактор.

Кога и како треба да се користи заштитен фактор?

Нанесете го 15тина минути пред да излезете надвор за да може убаво да се впие во кожата. Препорачливо е да се нанесува крем со заштитен фактор на секои два часа, како и после пливање или зголемено потење, без разлика дали станува збор за крем со висок или со понизок заштитен фактор. Целото тело треба да биде убаво покриено за да имаме максимална заштита од сончевите зраци. Заштитете ги и усните така што ќе нанесете балсам со заштитен фактор. Меѓутоа, УВ зрачење има во текот на целата година. Околу 80% од УВ зраците можат да се пробијат низ облаците дури и кога времето е облачно или да се рефлектираат од површини како песок, вода или снег. Токму поради ова се препорачува користење на заштитен фактор преку целата година.

Што точно претставува SPF (Sun Protection Factor)?

„Доколку се придржувате до наведените препораки, вие се заштитувате од изгореници, прерано стареење и рак на кожа.“

SPF бројот кој го пишува на амбалажата го претставува нивото на заштита од сонце што производот го нуди (заштитниот фактор). Но, треба да се забележи дека заштитниот фактор всушност покажува колку долго време ќе и треба на вашата кожа да поцрвени после нанесувањето на кремот, споредено со времето потребно кожата да поцрвени кога немате нанесено заштитен фактор. На пример, ако користите крем со SPF 15, тоа значи дека на кожата ќе и треба 15 пати подолго време да изгори отколку без нанесување на заштитен фактор (ако без заштитен фактор горите за десет минути, кога користите производ со SPF 15 ќе ви требаат околу 150 минути да изгорите).

Прочитајте:  Лубеницата како хранливо и освежително решение за летните денови

Како што рековме, бројот на заштитниот фактор го претставува нивото на заштита од штетното сонце:

  • SPF 10 нè заштитува од 90% од УВБ зраците
  • SPF 15 нè заштитува од 93% од УВБ зраците
  • SPF 30 нè заштитува од 97% од УВБ зраците
  • SPF 50 нè заштитува од 99% од УВБ зраците

Како што можете да видите разликата во нивото на заштита од штетните УВБ зраци помеѓу различните видови на SPF е мала. Имајте на ум дека бојата на кожата, возраста, склоноста кон изгореници, итн. треба да влијаат при изборот на заштитниот фактор. Изборот на повисок заштитен фактор нуди малку поголема заштита од штетното сонце, но ниту еден заштитен фактор не може да блокира 100% од УВ зраците.

Каков крем со заштитен фактор ви е потребен?

Според Американската академија за дерматологија – American Academy of Dermatology се препорачува да се користат кремови кои:

  • нудат широк спектар на заштита (заштита од УВБ и УВА зраците)
  • имаат SPF 30 или повеќе
  • се отпорни на вода

Доколку се придржувате кон горенаведените услови при изборот на крем со заштитен фактор, тогаш придонесувате за поголема заштита на кожата од УВ зрачење. Ја заштитувате од изгореници, прерано стареење и рак на кожа. Бидејќи заштитниот фактор не ги блокира целосно штетните зраци, потребно е да се користат и други начини за заштита од сонцето. Исто така, користењето на заштитен фактор може да го намали создавањето на витамин Д. Ако јадете одреден вид на храна или користите  витамински суплементи може да ја надоместите количината на витаминот Д што ви е потребна.

Каков вид на производ со заштитен фактор ви треба?

Кога станува збор за видот на производ со заштитен фактор, изборот е само ваш се додека се придржувате кон препораките (широк спектар на заштита, SPF 30 и отпорен на вода). Изборот направете го врз основа на тоа кој дел од телото го заштитувате. Постојат кремови, лосиони, гелови, спреови, стикови и масла со заштитен фактор.

  • Кремовите се добри за сува кожа и за лице
  • Геловите се препорачуваат за влакнести површини како скалпот или пак градите кај мажите
  • Стиковите се добар избор за заштита на кожата околу очите
  • Спреовите најчесто ги користат родителите затоа што се лесни за нанесување на детската кожа.
  • Постојат и специјални производи со заштитен фактор кои се направени за бебиња или за чувствителна кожа.

На крај ви останува да ги земете во предвид сите совети за заштита од штетните УВ зраци и да уживате во остатокот од летото.


Споделете со пријателите!