Зика вирусот продолжува да се шири, но во Македонија засега нема место за паника
Што е Зика вирус?
Зика вирусот го пренесуваат комарците од родот Aedes, истите комарци кои пренесуваат денга, чикунгуња и жолта треска. Вирусот за прв пат е изолиран во 1947 година кај мајмуни, во Зика тропските шуми на Уганда, од каде го добил и името. Постојат две ZIKV линии: Африканска и Азиска, која неодамна се појави во Пацифичкиот регион и регионот на Америка. Првата епидемија на ZIKV идентификувана надвор од Африка и Азија, беше регистрирана во Микронезија на островот Јап во 2007 година.
Кои се негови карактеристики и симптоми?
Главни симптоми се макуларен или папуларен исип, треска, артралгија, негноен конјунктивитис односно конјунктивална хиперемија, болки во мускулите и главоболка. Инкубациониот период се движи од 3 до 12 дена по каснувањето од заразениот комарец. Повеќето од инфекциите се асимптоматски.
Зошто е опасен?
Опасен е бидејќи сè уште не постои вакцина за превенција, ниту специфична терапија или лек.
Може да се појави и како инфекција заедно со други болести кои се пренесуваат преку комарци како што се денга треска, чикунгуња и маларија. Најзагрижувачки е фактот дека се поврзува со невролошкото нарушување микроцефалија кај фетусот и новороденчињата, како и заради новооткриените можни начини на трансмисија преку сексуален контакт. Токму овој нов случај на Зика, со пренос преку полов однос, предизвика паника во светот и го отвори прашањето дали овој тропски вирус може да се пренесува од човек на човек.
Каде се прошири Зика вирусот до сега?
Според најновите податоци добиени од Американскиот центар за контрола и превенција на заразни болести (CDC) и Светската здравствена организација (WHO), досега вирусот е застапен во: Бразил, Барбадос, Боливија, Кејп Верде, Колумбија, Костарика, Куракао, Доминиканска Република, Еквадор, Ел Салвадор, Гвадалупе, Гватемала, Хаити, Хондурас, Јамајка, Мексико, Никарагва, Панама, Парагвај, Порторико, Сент Мартин, Суринам, Самоа, Тонга, Девствени Острови и Венецуела.
Кои мерки треба да се преземат?
Треба да се применуваат мерки за лична заштита за да се избегнат каснувања од комарци кога се престојува во области со ризик. Патниците, особено деца, бремени жени и лица со имунолошки заболувања или тешки хронични болести, треба да се консултираат со својот лекар или да побараат совет за препораки. СЗО прогласи глобална вонредна состојба, а Бразил ги предупреди бремените жени да избегнуваат контакти во поголема група на луѓе.
Кај нас е мал ризикот за појава на оваа инфекција, бидејќи на нашите подрачја не е потврдено присуство на комарецот кој го пренесува овој вирус. Со цел да се преземат сите мерки на заштита, од идниот месец во Македонија ќе се почне со дезинсекција.
