Што најмногу пребаруваа Американците на „Гугл“ во 2016 година
Пребарувачот „Гугл“ (Google) на сите ни е првото место кога сакаме да дознаеме нешто, а здравствените прашања не се исклучок на оваа навика. Колку пати сте започнале со пребарување на нешто најбанало, па сте завршиле на форуми, избезумени дека симптомите што ги имате се погубни. Познатата новинарска куќа Си-ен-ен (CNN) открива кои десет здравствени прашања беа најпребарувани во 2016 година. На врвот на листата се прашањата за Зика вирусот како и за кинеската терапија со врели чаши, наречена cupping. Секако, и оваа година, остануваат прашањата поврзани со бременост, како на пример: „Дали може се затрудни за време на месечен циклус?“
Што е Зика вирус?
Оваа тема беше најголема здравствена тема и најпребарувана во 2016 година. Pharmanews.mk исто така доста пишуваше и информираше за најпопуларниот вирус годинава. Од десетте најпоставувани прашања на Гугл за Зика има две прашања: „Колку време трае Зика“ и „Кои се симптомите на Зика“. Зика вирусната инфекција е болест предизвикана од вирус кој се пренесува преку Aedes комарци. Лицата кои се заразени со Зика вирусот обично имаат блага треска, осип на кожата (егзантем) и конјунктивитис. Овие симптоми обично траат 2-7 дена. Во моментов не постои специфичен третман или вакцина за оваа болест а најдобра превенција е заштита од каснување од комарци. Вирусот циркулира во Средна и Јужна Америка, Африка, Азија и Пацифичкиот регион.
Што е cupping?
Во периодот на Летните Олимписки Игри, се дозна дека најпознатиот пливач Мајкл Фелпс користи здравствен метод на cupping. Cupping, е метод на преднаучно и предмедицинско „лекување “кој постои неколку илјади години. Технички загреани чаши се поставуваат на болното место, кои при ладење прават вакуум при што настанува пукање на ситните капилари. Затоа на кожата се појавуваат црвените кругови кои што исчезнуваат за три до четири дена. Спортистите на ЛОИ тврдеа дека оваа терапија им помага при стимулација на мускулите, дека ги опушта и им ја намалува болката. Освен прашањата за cupping, меѓу најпоставуваните прашања за време на ЛОИ, било и прашањето за допинг.
Што е TBI?
TBI е трауматска повреда на мозокот. Секој поголем потрес на мозокот, внатре во черепот, може да доведе до повреда на мозокот. Во случаи на удари врз главата може да настане локална повреда на мозокот. Од ударот се формираат бранови во мозокот и на тој начин го оштетуваат. Примарните повреди на мозокот настануваат веднаш по повредата, каде мозочното ткиво и крвни садови се истегнати, притиснати или раскинати а секундарната повреда на мозокот настанува како последица на примарната, по неколку минути или денови.
Другите најпоставувани прашања на територијата на САД за 2016 се:
- Дали бронхитисот е заразен?
- Како најбрзо да се ослободиш од херпесот?
- Колку долго е заразен конјуктивитисот?
- Кои се причините за габична инфекција?
- Дали може да се затрудни на контрацептивни таблети?
- Дали може да се затрудни за време на месечен циклус?
Помеѓу светски најпоставуваните прашања на Гугл се уште и: „Што е пеницилин“, „Што е хетеросексуалност“, „Што е допамин“, „Што значи 420“.
Доколку ве интересираат некои од горенаведените прашања, пребарајте на нашата страница.
