olimpiski-simboli_image
Споделете со пријателите!

На почетокот од Игрите, прочитајте за препознатливите олимписки симболи но и за модерните емоџи симболи на социјалните мрежи
Започнаа Олимписките Игри, најголемиот светски спортски спектакл. Бидејќи периодов цел свет ќе биде свртен кон Рио, и сите ќе зборуваат за Игрите, прочитајте неколку интересни информации поврзани со карактеристичните олимписки симболи и за начинот на кој се создале.

Мото

Познатото олимписко мото „Побрзо, повисоко, посилно“ (од лат. Citius, Altius, Fortius) , кое го изразува духот на олимпизмот, за прв пат било употребено на ЛОИ 1924 во Париз. Предложено е од Пјер де Кубертен, основоположникот на современите Олимписки игри. Според него, овие три зборови ја опишуваат моралната убавина и естетиката на спорот која е нематеријална.

Олимписки прстени

Петте олимписки прстени со сина, жолта, црна, зелена и црвена боја, аплицирани на бела основа, кои се исто така дизајнирани од баронот Пјер де Кубертен, ги претставуваат боите на знамињата на земјите учеснички, како и петте континенти. Испреплетените прстени ја симболизираат универзалноста на олимпизмот и дружење на спортистите од целиот свет за време на Игрите. Овие кругови на бела позадина се и знамето на Игрите.

Олимписки оган

Традицијата на палење на Олимпискиот оган, датира од Стара Грција, каде пламенот бил запален со помош на сончева рефлексија, а огнот се одржувал сè до затварањето на Олимписките игри. Олимпискиот оган е запален во античкиот локалитет на Олимпија од жени облечени во антички стил.

Олимписки факел

Олимпискиот факел го симболизира продолжувањето на античките Олимписки игри преку современите игри. Тој се пренесува од еден тркач на друг, од Олимпија со стадионот кај што се одржуваат Игрите.

Прочитајте:  Нова кампања „Хранете се здраво за детство среќно и убаво“

Олимписка химна

Олимписката химна оди за време на подигањето на Олимпиското знаме. Компонирана е од Спиридон Самарас, а зборовите се напишани од грчкиот поет Костис Паламас. Иако е напишана многу порано, за официјална химна е прогласена во 1957 година.

Медали

Доделување на медали на најдобрите натпреварувачи е уште еден од симболите поврзан со олимписките игри. Медалите на секои Игри имаат специфичен дизајн за кој одлучува земјата организатор на Игрите. Од 1928 година до 2000 година, на секој медал била прикажана грчката божица на победата Ника.

Олимписки венец

Венецот е главно обележје на Олимписките игри. Маслиновите венци во античка Грција се правеле од маслинови гранки во едно свето место близу Олимпија на Пелопонез, каде што се одржувале Игрите. Овој обичај бил воведен од страна на Херкул како награда за победникот во трчање во чест на Зевс.

Модерни симболи поврзани со Олимпијадата на социјалните мрежи

olimpiski-simboli_image1Веќе и не може да се замисли настан без емоџи симбол направен по мерка кој ќе се комуницира и споделува на социјалните мрежи. Во чест на Олимписките игри, социјалната мрежа „Твитер“ направи специјализирани емоџи симболи како додаток на конкретен хаштаг. На пример, доколку сакате да напишете твит за Грција на Олимпијада, потребно е да ставите хаштаг #GRE и веднаш до него автоматски ќе се појави мало знаме од Грција. На истиот начин се појавуваат знамиња од 207 земји. Препознатливите олимписки симболи, на ист начин кореспондираат со својствен знак, поточно емоџи симбол, а исто така, свој симбол има и секоја спортска дисциплина.


Споделете со пријателите!