Доколку земате лекови а се подготвувате за плажа, информирајте се како да се заштитите од фотосензитивност
Лековите на рецепт, како и парфеми и останати производи за тело, можат да предизвикаат преголема чувствителност и реакција на кожата на сончевите зраци, поточно фотосензитивност. Реакцијата се гледа како воспалителен процес на кожата сличен на изгореници и сонце. Ако земате лекови, особено антибиотици а се подготвувате на одите на летување, имајте на ум дека тие лекови може да предизвикаат одредена реакција на кожата. Фотосензитивност може да предизвикаат и парфемите како и многу производи за тело (на пр. пилинзи), а особено етеричните цитрусни масла кои може да остават темни дамки на кожата. Препознавањето на симптомите е најважниот чекор при лечење на фотосензитивните реакции. Симптомите на фотосензитивност се одликуваат со два вида на реакции и тоа: фототоксична и фотоалергиска реакција.
Фототоксична реакција
Фототоксична е честа реакција кога УВ зраците го активираат фотосензитивниот лек. Се одликува со пецкање, по кое следи црвенило на изложените делови од телото. Оваа реакција се јавува многу брзо по земањето на лекот. Најчести лекови кои што може да предизвикаат фототоксична реакција се: лекови против акни, антихистаминици, нестероидни антиинфламаторни лекови, некои антибиотици, диуретици, антидепресиви, лекови за срце, лекови за третирање на канцер, орални контрацептиви.
Фотоалергиска реакција
Кај оваа реакција е вклучен и имунолошкиот систем. Реакцијата се јавува кога УВ зраците ќе ја променат супстанцијата која што претходно сме ја нанеле на кожата, на што одговорот на имунитетот се одликува со чешање, пликови и црвени делови. Реакцијата може да се јави веднаш по нанесување на препаратот, или наредниот ден. Реакцијата се смирува кога нема изложување на сонце. Интензитетот на оваа реакција варира од една личност до друга.
Како да се заштитите
Ако кожата ви е чувствителна на сончеви зраци, следете ги препораките на лекарите и избегнувајте изложување на сонце од 10 до 17 часот, редовно нанесувајте крем со заштитен фактор, не користете солариуми, заштитете се со облека со долги ракави изработена од природни материјали, носете капа и очила за сонце. Имајте на ум дека и под сенка и во вода може да изгорите, бидејќи сончевите зраци се рефлектираат од површината на водата и песокот. Еден од методите за решавање на овој проблем е земање на препишаниот лек пред спиење, за на тој начин активните супстанци од лекот да можат да делуваат во текот на ноќта. Иритираната кожа треба да се лекува со ладни облоги и нанесување на маст со кортикостероиди. Доколку реакцијата не се смири, задолжително обратете се кај лекар.
