vitaminot_D_i_negovite_zdravstveni_pridobivki_image
Споделете со пријателите!

Дали повеќе витамин Д е подобро за одржување на физичката подготвеност на луѓето?
Денес сè повеќе луѓе знаат за потенцијалните здравствени придобивки од внесот на витаминот Д. Но, за сите придобивки на овој витамин не може да се каже дека се проверени и поддржани со докази. Постојат тврдења според кои витаминот Д може да го намали ризикот од артритис, ја подобрува функцијата на мозокот и го намалува ризикот од деменција, го подобрува имунолошкиот систем и го намалува ризикот од појава на имунолошки нарушувања, делува превентивно во поглед на срцеви заболувања, итн. Не може да се каже ниту дека овие тврдења се точни ниту дека не се точни.

„Доволните количини на витамин Д се повеќе од потребни за одржување на здрави коски“

Ваквите тврдења произлегуваат најчесто од истражувања кои се поврзани со споредување на ниското ниво на витамин Д во крвта со зголемениот ризик од појава на болест или смрт. Иако не може да се потврди со сигурност дека горенаведените придобивки од витаминот Д се точни, доволните количини на витамин Д се повеќе од потребни за одржување на здрави коски. Само за споредба, големиот недостаток од овој витамин може да биде причина за болеста наречена остеомалација или „меки коски“ и за остеопорозата. Витаминот Д е важен за подобра апсорпција на калциумот кој е потребен за здрави коски. Оттука се поставува прашањето: Дали витаминот Д може да ја подобри физичката подготвеност на луѓето или тоа е само уште едно недокажано тврдење?

За да се даде одговор на ова прашање, треба да се земе во предвид едно истражување кое имало за цел да одреди дали земањето на висока доза витамин Д како додаток во исхраната, може да ја подобри физичката спремност на луѓето во поодминати години. За таа цел, во истражувањето учествувале околу 200 луѓе на возраст од најмалку 70 години кои во минатото се соочиле со некакво паѓање. На некои од нив им била дадена мала доза на витамин Д, додека пак на други им била дадена поголема доза. После една година, истражувачите ја процениле физичката подготвеност на учесниците, а во тоа спаѓала брзината на одење, способноста да стануваат и да седнуваат и нивната рамнотежа. Резултатите покажале дека луѓето што добиле поголеми дози на витамин Д, не биле подобри од останатите кои добиле мали дози на витамин Д.

Дури се забележало дека луѓето кои примиле повисоки дози пријавиле значително поголем број на падови. Ова истражување буди сомнеж во дејството на витаминот Д за одржување на физичката подготвеност кај повозрасните луѓе, но доколку би се следело дејството на витаминот во текот на подолг период  можеби би се откриле и други придобивки од истиот.

Витаминот Д е важен за организмот и земањето на овој витамин како додаток во исхраната може да им помогне на луѓето кои немаат доволно витамин Д, но сепак повеќе истражувања би биле потребни за да се потврдат некои од придобивките.

Внесувањето на дневната препорачана доза на овој витамин според возраста и полот, како и изложувањето на сончева светлина барем 10 до 15 минути на ден (сончевата светлина и УВ зрачењето помагаат за создавање на витамин Д во кожата) може да помогнат. Но, имајте во предвид дека поголемите количини не се секогаш подобра варијанта, како што видовме во гореспоменатото истражување.

Прочитајте:  И електронската цигара, создава зависност

Споделете со пријателите!