steta-predizvikana-od-uv-zracenjeto-i-soodvetna-zastita
Споделете со пријателите!

Откако дознавме повеќе за УВ зраците и нивното можно штетно дејство, потребно е да знаеме и како да се заштитиме
Нашето здравје треба да ни биде на прво место кога станува збор за штетата што може да биде предизвикана од УВ зрачењето. УВ зраците можат штетно да влијаат врз нас ако не знаеме како правилно да се заштитиме. Дупките во озонската обвивка ја намалуваат природната заштита од штетните сончеви зраци, па затоа е потребна дополнителна заштита. Не треба целосно  да го избегнуваме сонцето затоа што умереното излегување на сонце е здраво за нас. Сепак, преголемата изложеност не ни оди во полза, па затоа постојат различни начини преку кои можеме да се заштитиме од УВ зрачењето. Многумина од нас преземаат мерки за заштита само кога се наоѓаат на плажа. Меѓутоа, и секојдневното изложување на сонце може да биде штетно ако не се заштитиме.

Штета предизвикана од преголема изложеност на сонце

„Стареењето на кожата како и брчките предизвикани од сонцето се манифестираат многу подоцна од реалната изложеност на сонце.“
Штетното влијание на сонцето може да предизвика различни нарушувања на здравјето на човекот. Најчесто, прва на удар е кожата, но може да се предизвикаат и други здравствени проблеми. Кога се соочувате со некакво заболување или се сомневате дека имате одреден проблем предизвикан од штетните УВ зраци најдобро е да се обратите на лекар.

Рак на кожа

Изгорениците на кожата и преголемата изложеност на штетното УВ зрачење се едни од најризичните фактори кои влијаат врз појавата на рак на кожа. Раното откривање е многу важно кога станува збор за овој сериозен тип на кожно заболување. Ако забележите било какви промени на кожата или на бемките и младежите кои ги имате, се препорачува да се обратите на лекар во најбрзо време.

Предвремено стареење на кожата

Појавата на брчки и предвременото стареење на кожата се резултат на несоодветната заштита од сонце, меѓу останатите фактори. Стареењето на кожата како и брчките предизвикани од сонцето се манифестираат многу подоцна од реалната изложеност на сонце. Затоа, многу луѓе мислат дека појавата на брчки со текот на времето е нормален процес на стареење. Но, според некои истражувања скоро 90% од видливите промени на кожата се предизвикани од сонце ако не се користи соодветна заштита од УВ зрачењето.

Проблеми со очите

УВ зрачењето може да го зголеми ризикот од појава на катаракта, рак на кожата околу очите и други очни заболувања. Доколку веќе се соочувате со некои очни проблеми, изложеноста на сонце без заштита може дополнително да ги влоши. Затоа, соодветната заштита е многу битна.

Ослабување на имунолошкиот систем

Проблеми со имунолошкиот систем исто така можат да се појават како резултат на штетното влијание на УВ зрачењето. Природниот начин на кој кожата се брани од инфекции може да биде нарушен и да води кон останати кожни заболувања.

Како да се заштитиме?

Покрај различните кремови за заштита од сонце кои денес можат да се најдат насекаде, постојат и некои други работи што може да ги направите за дополнително да се заштитите од УВ зрачењето.

Прочитајте:  3 начини како да се справите со џетлег и 3 начини што ги правите погрешно
Одете под сенка

Се препорачува да го ограничите времето кое го поминувате на сонце, особено во периодот помеѓу 10 и 16 часот. Најубаво е да си побарате добра сенка која ќе ве заштити од штетното влијание. УВ зраците се присутни во текот на целата година, но нивната јачина зависи од неколку фактори меѓу кои се вбројуваат годишното време, времето во текот на денот, итн. Добро е да се провери и УВ индексот за да знаете точно со колкава јачина на УВ зрачење се соочувате.

[interaction id=”55a37a529831cbaa216f525f”]
Облечете лесна облека

Кога сте надвор, најдобро е што поголем дел од кожата да ви биде покриен со лесна и широка облека. Темната облека заштитува повеќе од светлата затоа што темните бои како и јаките бои апсорбираат повеќе УВ зраци отколку светлите и пастелни бои. Сувата облека заштитува повеќе отколку влажната. Денес, постои облека со фактор за заштита од УВ зраци кој се движи од 15 до 50+. Колку е поголем факторот, толку повеќе сте заштитени. Но, имајте на ум дека облеката не ги блокира целосно УВ зраците. Дополнителна заштита како кремови за сончање, сенка, капа на главата, итн. е потребна исто така.

Заштитете ја главата и очите

Носењето на капа кога сте изложени на сонце ќе ги заштити деловите на телото кои најчесто горат кога сте предолго изложени на сонце како скалпот на главата, очите, ушите, челото и носот. Капите или шеширите кои имаат поголема стреа околу главата можат дополнително да го заштитат и вратот. Но, запомнете дека сламените шешири заштитуваат помалку отколку цврсто исткаениот материјал на капите.

Очилата за сонце со УВ фактор се многу важни за да ја заштитиме нежната кожа околу очите како и самите очи. Идеалните очила за сонце треба да блокираат од 99-100% од УВА и УВБ зраците. Темната боја на очилата не значи дека тие заштитуваат повеќе. Заштитата кај очилата за сонце доаѓа од невидлива супстанца која е нанесена на очилата и која не заштитува од штетните зраци. Поголемите и пошироки очила заштитуваат поголем дел од кожата околу очите. Децата треба да носат очила со заштита од УВ зраци исто така, а не очила – играчки кои не нудат никаква заштита од штетното влијание на сонцето. Дури и очилата за подобрување на видот и леќите треба да заштитуваат од штетните зраци. Денес постојат леќи кои навистина блокираат најголем дел од УВ зраците, но тие не се доволна заштита затоа што не го покриваат целото око.

Избегнувајте ги солариумите

Многу луѓе мислат дека одењето во солариум не е штетно. Но, солариумите исто така емитираат УВ зраци кои можат да предизвикаат кожни заболувања ако се практикуваат многу често и ако не се користи соодветна заштита како кремови со заштитен фактор.

Следната недела прочитајте се што е потребно да знаете за кремовите со заштитен фактор.


Споделете со пријателите!