Јапонските истражувачи веруваат дека состојките од прополисот помагаат во спречувањето на ќелавоста кај глувците заморчиња поради своите антивоспалителни својства и дека истите состојки, исто така можат да помогнат во спречувањето на губење коса кај луѓето
Во денешниот модерен свет, кога човекот до таа мера ја развил технологијата и веќе прави обиди да живее на другите планети, ќелавоста сè уште е проблем кој ги засега сите, како мажите, така и жените и сè повеќе помладите. Козметичките индустрии и естетските хирурзи развиваат и веќе имаат развиено модерни, но и многу скапи третмани за поттикнување на растот на косата, за пресадување на коса и сл. Според нив, ќелавоста наскоро ќе биде минато, но гледано од страна на засегнатите страни, тоа е малку потешко остварливо. Секој не може да си го дозволи луксузот на пресадување коса.
Лекот за поттикнување на растот на косата можеби е многу едноставен, евтин и лесно достапен за сите, особено за оние луѓе кои се занимаваат со пчеларство, бидејќи јапонските научници се уверени дека прополисот е лек против ќелавост. Неодамна Јапонците открија дека прополисот – природниот пчелин лепак, т.е. смолестата супстанца со темнозелена боја, којашто пчелите ја користат за запечатување на рамките со саќе во кошниците – го стимулира растот на косата кај глувците.
„Прополисот може да го поттикне растот на клетките кои придонесуваат за раст на косата“, вели Кен Кобајаски – Ken Kobayaski главниот автор на студијата.
И покрај тоа што прополисот бил тестиран до сега само на глувци и потребни се понатамошни истражувања, истражувачите веруваат дека прополисот е лек против ќелавост и за луѓето. Губењето на косата кај глувците е предизвикано од воспаление, а прополисот содржи антивоспалителни компоненти. Токму поради ова својство на пчелниот производ прополис, истражувачите сметаат дека дејствува како противотров за ќелавост. Научникот Кобајалски објаснува дека третманите со прополис ги стимулираат кератиноцитите во влакната кај депилираната коса на грбот од глувците.
Студијата, објавена во Зборникот за земјоделска и прехранбена хемија – Journal of Agricultural and Food Chemistry, откри дека групата глувци на кои претходно им биле избричени или депилирани крзната на крбот, надворешно им бил нанесуван прополис и нивното крзно пораснало многу побрзо, отколку глувците на кои не им бил мачкан прополисот.
„Важно е тоа дека бројот на клетките вклучени во растот на косата се зголеми, откако прополисот бил нанесен на кожата“ – заклучува Кен.
Покрај ова, откриено е дека прополисот ја олеснува пролиферацијата на епидермалните кератиноцити и дека овие резултати укажуваат дека оваа супстанца го стимулира растот на косата, преку поттикнување на кератиноцитите во косата кон пролиферација (раст на клетките). Потребни се понатамошни истражувања за научниците да можат да докажат дека прополисот ја спречува и лекува ќелавоста. Како и да е, консултирајте се со кожен специјалист, доколку сакате да се обидете да ги отстраните воспаленијата на кожата од главата и доколку сакате да ги поттикнете влакната од косата повторно да пораснат со надворешно мачкање со прополис.
