Кашлицата може да се класифицира според нејзиното времетраење, карактерот, квалитетот и тајмингот
Кашлицата е ненадеен повторувачки рефлекс којшто помага во расчистување на големите дишни патишта од секрети, иританси, страни тела и микроби. Рефлексот на кашлање се состои од три фази:
- вдишување;
- присилно издишување против затворениот глотис;
- насилно ослободување на воздухот од белите дробови по отварање на глотисот;
Кашлицата може да биде волунтерна или присилена.
Причинители на кашлица:
Честото кашлање обично укажува на присуство на болест. Многу вируси и бактерии предизвикуваат кашлица кај домаќинот, но исто така та може да биде предизвикана и од пушење, загадување на воздухот, астма, болест на гастроезофагијалниот тракт, хроничен бронхитис, тумор на бели дробови, срцева слабост и лекови.
Патофизиологија:
Рефлексот на кашлица е инициран со стимулација на две различни класи на аферентни нерви, имено миелинизирани брзоприспособувачки рецептори и нервни завршетоци на немиелинизирани Ц влакна во белите дрбови.
Класификација на кашлицата:
Кашлицата може да се класифицира според нејзиното времетраење, карактерот, квалитетот и тајмингот. Според времетраењето може да биде акутна – ако е присутна помалку од 3 недели, субакутно – ако е присутна помеѓу 3 и 8 недели, и хронична која трае повеќе од 8 недели. Кашлицата може да биде непродуктивна, сува или продуктивна со присуство на спутум.
Продуктивна кашлица:
Продуктивната или влажната кашлица е резултат на присуство на мукус или друга течност во горниот или долниот респираторен тракт. Мукусот може да патува надолу, преку задниот дел на грлото од носот или синусите или е можно да дојде нагоре од белите дробови. Продуктивната кашлица генерално не треба да се супресира затоа што ги прочистува белите дробови од мукусот. При продуктивна кашлица, пациентот може да чувствува конгестија, стеснување во градите. Симптомите најчесто се влошуваат при будење и зборување.
Влажната кашлица често е последниот симптом после настинка.
Зависно од причината на продуктивната кашлица другите симптоми се: недостаток на воздух, треска, настинка и симптоми на грип, отежнато дишење, кашлица која се влошува со тек на времето, искашлување на јасен, жолто, светлокафеав или зелен слуз, брзо дишење (тахипнеа) и болка во градите.
Постојат многу фактори кои придонесуваат за причинување на продуктивна кашлица: вирусни болести, инфекции (продуктивната кашлица може да биде симптом на пневмонија, бронхитис, синузитис или туберкулоза), хроничнаопструктивна белодробна болест – ХОББ, рефлукс на стомачна киселина кон езофагусот, назален исцедон што се слева надоле преку задниот дел на грлото, ова може да предизвика продуктивна кашлица или чувство дека постојано треба да се листи грлото, пушење.
Третман:
Во одредени ситуации неопходна е промена на одредни животни навики. Доколку станува збор за одредена бактериска инфекција неопходна е употреба на антибиотска терапија, како и употреба на супортивна терапија од типот на муколитици (ацетилцистеин, бромхексин и други).
Д-р Аднан Сулејмани, специјалист педијатар
