Нов растворлив лек што содржи течен аспирин, како потенцијално научно достигнување за иднината во лекувањето на тумори на мозокот
Ново истражување од Универзитетот во Портсмаут во Велика Британија, беше презентирано за време на средбата „Мозочни тумори 2016 – од биологија до терапија“ што се одржа во Варшава, Полска од 27-29 јуни оваа година. Опишувајќи ги нивните наоди како „потенцијално иновативни“ за иднината на третирањето на мозочните тумори, професорот Џеф Пилкингтон – Geoff Pilkington и д-р Ричард Хил – Richard Hill, објаснија дека нивниот нов лек е во можност да ја премине крвно-мозочната бариера.
Како што пренесува новинарката Кетрин Педок – Catharine Paddock за MNT, крвно-мозочната бариера е како паметна обвивка којашто истовремено го заштитува мозокот од непознати супстанци во крвотокот, но им овозможува и на есенцијалните молекули да поминат од мозокот во крвотокот и обратно. Истражувачите кои се обидуваат да развијат лекови против рак за лекување на тумори на мозокот се соочуваа со потешкотии во пронаоѓањето на синтетички состојки коишто лесно ќе поминуваат низ крвно-мозочната бариера. Многу од досегашните фармацевтски лекови против рак, коишто можат да им се спротивстават на туморите во другите делови на телото, не можат да стигнат до мозокот. Научниците истакнуваат дека вистинскиот течен аспирин долго време бил цел на многу научни истражувања.
Моментално достапните аспирини коишто се окарактеризирани како „растворливи“, не се целосно растворливи.
Тие содржат ситни честички од цврст аспирин што предизвикуваат несакани последици во дигестивниот тракт, особено желудникот. Новиот растворлив лек што се состои од аспирин и две други состојки е наречен IP1867B, а создаден е во соработка со фармацевтската компанија Innovate Pharmaceuticals. Истражувачите забележуваат дека сите три состојки веќе се одобрени за клиничка употреба и дека досегашните истражувања сугерираат дека тие го уништуваат ракот без да го оштетат мозочното ткиво.
Тие велат дека новооткриениот лек од нивна страна може да биде високо ефективен за лекувањето на глиобластом, еден од најопасните и најчести видови на тумори на мозокот кај возрасните. Експертите проценуваат дека ќе има 23.770 нови случаи и 16.050 смртни случаи од канцер на мозокот и канцери на нервниот систем во САД до крајот на годинава. „Науката како оваа е таа што ќе ни овозможи на крајот да се најде лек за оваа катастрофална болест која убива повеќе деца и возрасни под 40 годишна возраст од било кој друг рак“ – истакнува главниот извршен директор на Brain Tumour Research, Сју Фарингтон Смит Sue Farrington Smith.
