puter-ili-margarin
Споделете со пријателите!

За да се направи правилниот избор за вашето тело и здравје, треба да ги знаете добрите и лошите страни на двата продукти и да знаете во каква состојба и форма се наоѓате и што ви е потребно во моментот
Мастите се неизбежни за телото правилно да функционира, да ги апсорбира потребните витамини (не без причина во свежите салати се става масло), да ги намалува штетните ефекти од зголемувањето на нивото на одредени хормони, како што е хормонот на стресот кортизол, кој е најчеста причина за појава на канцер. Но, кога станува збор за мастите што се мачкаат на леб најчесто се јавува дилемата што е подобро путер или маргарин? Колку и да се трудиме да се храниме здраво и правилно, тешко е да се направи дистинкција помеѓу одредени врсти на продукти и да се одбере подобрата варијанта. Многумина сметаат дека се што е природно е здраво, а други пак, дека се што е создадено од човекот како замена на природните продукти е подобро.

Треба да се има во знаење дека производите сами по себе не се штетни, туку штетни се дозите и комбинациите.

„Путерот е продукт од животинско потекло, а маргаринот е продукт од растително потекло како замена за путерот, па оттука путерот содржи заситени, а маргаринот незаситени масти.“

За да се направи правилниот избор за вашето тело и здравје – треба да се знаат што е можно повеќе информации за двата типови на продукти и да знаете во каква состојба и форма се наоѓа вашето тело и што му е потребно во моментот (на пр. дали сте изложени на голем стрес, физички или умствен напор или дали имате одредено заболување на пр. дали имате срцеви проблеми и проблеми со артериите и вените или пак, покачен холестерол) за да може правилно да одлучите.

Главна разлика помеѓу путерот и маргаринот е:

Путерот е продукт од животинско потекло направен од млечни масти, а маргаринот е продукт создаден пред два века од растително потекло т.е. од растителни масти, најчесто сончоглед, пченка, соја, палма и сл. како „поздрава“ замена за путерот. Оттука путерот содржи заситени масти, а маргаринот незаситени. Двата производи имаат свои добри и лоши страни. До пред некое време путерот беше на широко критикуван, а растителните маргарини започнаа да се здобиваат со популарност, како што лекарите ги сфатија опасностите од заситените масти. Сепак, многу видови на маргарини имаат нездрави транс масти. Според американската асоцијација за срце треба да се одбираат производи со најмалку заситени масти и без транс масти.

Во однос на постапката на произведување, путерот е поприродна варијанта од маргаринот. Постапката за правење путер е многу едноставна, а се состои од механичко тресење на млечните масти се додека не добијат полуцврста состојба, додека пак и покрај тоа што маргаринот е направен од растителни масти (па според тоа некои ќе речат дека е природен), постапката на правење маргарин е лабораториска т.е. хидрогенизација со водорот во присуство на никел катализатор и тоа автоматски го прави посинтетички производ од путерот. Маргарините направени на овој начин содржат хидрогенизирани масти. Ако некои од хемиските врски не се хидрогенизирани текот на процесот, тие сè уште ќе бидат присутни и во крајниот продукт.

Прочитајте:  Суровини за производство на леб

Доколку го погледнете составот на путерот и маргаринот, веднаш се забележува огромна разлика. Составот на путерот е многу едноставен – млечни масти, а за да го прочитате составот на маргаринот, потребно ви е повеќе време. Покрај основата – вода и растителни масти како сончогледово или палмино, во маргаринот се содржи и низа на додатни состојки за одржување на цврстината, за подобрување на вкусот и бојата и слично. Еве некои од тие состојки наведени на амбалажата на два типа популарни маргарини кај нас: млеко во прав, моно и диглицериди на масни киселини, конзерванси, како калиум сорбат (Е202), регулатори на киселост (Е270, Е330), додадени витамини, арома, боја, траги од соја.

„Сите состојки коишто на телото му прават шок и го збунуваат, бидејќи не може или пак, не знае како да ги разложи – најчесто се таложат во масните наслаги околу стомакот.“

Во составот на „диеталните“ маргарини има дури и повеќе вакви чудни и тешки за изговор состојки, кои не претставуваат ништо друго освен хемиски соединенија, како полиглицеролполирицинолат, емулгатори (Е471, Е476), гликоза, лецитин (Е322), лимонска киселина (Е330) и сл. Во нивниот опис производителите велат дека се производи сродни на маргарин, што значи дека тие не претставуваат ни маргарин.

Треба да се има предвид дека телото на човекот полесно ги преработува хранливите состојки од природно потекло и има проблем со разградување на елементите кои му се непознати на организмот. Сите состојки коишто на телото му прават шок и го збунуваат, бидејќи не може или пак, не знае како да ги разложи – најчесто се таложат во масните наслаги околу стомакот.

За избалансирана исхрана најдобро е доколку секој ден консумираме разновидни прехранбени производи. Па, затоа во вашата диета пожелно е да бидат застапени како путерот, така и маргаринот, бидејќи двата имаат свои позитивни страни, а без разлика дали ќе се одлучите за путер или маргарин, одбегнувајте ги солените варијанти на овие производи. Иако солта го подобрува вкусот и без неа не можеме да го оствариме соодветниот хемиски баланс во нашите тела сепак, штетните последици од консумирање премногу сол се навистина големи.


Споделете со пријателите!