Повеќе од 90% од недоносените бебиња преживуваат, растат и се развиваат без посериозни и долгорочни проблеми.
Бременоста трае во просек од 40 недели (нормално помеѓу 38 и 42 недели). Прераното породување е кога бебето е родено пред 37 недели. Оттука, бебе родено на 36 недели и 6 дена би се сметало за прерано родено бебе.
Степенот на прематуритет често се дели на четири периоди според гестациската старост на плодот:
- од 23 – 28 недели;
- од 28 – 32 недели;
- од 32 – 36 недели;
- од 36 – 37 недели.
Гестациска возраст
Гестациската старост е должината на времето кога бебето се развива во матката. Се пресметува од првиот ден од последниот менструален циклус. Точната гестациска старост е важна затоа што некои недоносени бебиња може да не бидат толку развиени што предизвикува потреба од медицинска поддршка за нивните бели дробови, срце, стомак и црева, контрола на температурата и хранење. На пример, на повеќето бебиња кои се родени на помалку од 32 недели од бременоста им е потребна помош при дишење и вообичаено тие се згрижуваат во дело за интензивна нега за новороденчиња.
Ниска родилна тежина
Бебињата може да бидат и предвремено родени и со ниска родилна тежина. Ниска родилна тежина е кога бебињата тежат помалку од 2,5 килограми. Предвреме родените бебиња може да имаат ниска родилна тежина бидејќи честопати немаат шанса да ја зголемат телесната тежина во последните недели или месеци од бременоста. Овие бебиња имаат ниска родилна тежина, но се со соодветна големина за нивната гестациска старост.
Ниска родилна тежина, исто така, може да се случи кога, поради некоја причина, бебињата не можат да пораснат колку што е вообичаено во матката, што ги прави мали за нивната гестациска старост.
Фактори на ризик за предвремено породување
Кај околу половина од сите предвремени раѓања причината е непозната. Но следните фактори ја зголемуваат веројатноста за предвремено раѓање на бебе:
- претходно предвремено породување на мајката;
- некои состојби на матката или грлото на матката, како што се фиброиди или ослабено грло;
- повеќекратна бременост – близнаци или повеќе деца;
- инфекција или состојба кај мајката што бара породувањето да се изведе брзо заради безбедноста на мајката и бебето (пр. прееклампсија);
- состојби како дијабетес или висок крвен притисок.
Постојат и други фактори кои се поврзани со предвременото породување. Тие вклучуваат слаба или недоволна исхрана, премногу физичка активност, стрес, анксиозност, депресија, прекумерна и недоволна тежина, пушење цигари, пиење алкохол, употреба на дрога и недостаток на пренатална нега. Бременоста на возраст под 17 или над 35 години, исто така, може да претставува фактор за предвременото породување.
Најдобар начин да бидете сигурни дека вашата бременост е во најдобар ред е да ги следите советите на вашиот лекар:
- да се храните здраво;
- да не пушите, пиете алкохол и да не земате одредени лекови;
- умерено да практикувате физичка активност;
- да избегнувате појава/зголемување на стрес, депресија и анксиозност.
Дури и ако ги следите сите совети од вашиот доктор во текот на бременоста, повторно може да се случи да имате предвремено породување. Оттука, доколку мислите дека можеби сте изложени на ризик од предвремено раѓање, разговарајте со вашиот лекар.
Знаци и симптоми на предвремено породување
Ако имате некој од следните симптоми, треба да се обратите кај вашиот лекар. Овие симптоми може, но и не мора да значат дека имате породилни болки, сепак не треба да бидат занемарени:
- постојана болка во грбот;
- чувство дека вашето бебе се турка надолу или чувство на притисок во карлицата;
- отекување на рацете, нозете или лицето;
- контракции кои се манифестираат повеќе од четири пати на час;
- гадење, повраќање или дијареа;
- заматен вид, двоен вид или други нарушувања на видот и очите;
- абдоминални грчеви, слично како оние во менструалниот период;
- чувство дека движењата на вашето бебе се забавени или запрени;
- вагинална течност или крв.
Развој на предвремено родените бебиња
Повеќе од 90% од недоносените бебиња преживуваат, растат и се развиваат без посериозни и долгорочни проблеми. Генерално стапките на преживување на предвремено родените бебиња постојано се подобруваат, бидејќи медицината оди напред.
Преживувањето на бебето во голема мера зависи од тоа во кој период од бременоста е родено. На пример, бебињата родени во периодот од 32-36 недела имаат поголема веројатност да преживеат од бебињата родени во периодот од 23-28 недела.
Поголемиот дел од предвремено родените деца се развиваат нормално. Колку е поголема гестациската старост на бебе, толку се помалку шансите да има некои здравствени или развојни проблеми. Бебињата кои се родени во периодот од 36-37 недела најчесто немаат сериозни долгорочни проблем, додека бебињата родени во периодот од 23-28 недела имаат зголемен ризик од развојни проблеми.
