Совети што ќе ви дадат насоки кои активности треба да ги направите пред да го донесете на свет вашето најмило
Периодот на очекување на новороденче може да биде најубавиот период од животот на една жена или пак најстресниот. Можеби најточен опис би било дека овој период претставува една постојана мешавина од овие две доминантни чувства заради стравот од неочекуваното. И тоа е нормално. Психолошката подготовка е поддеднакво важна колку и физичката, која се состои од грижа за здравјето и исхраната. Исхраната и животниот стил на трудницата во голема мера го одредуваат и нејзиното расположение. Затоа најдобро е водење на уреден и мирен живот, без стрес и поголеми оптеретувања. Во продолжение, ви нудиме неколку совети за работи кои што треба да ги направите пред да заминете во болница.Посета на советувалиште за трудници
Во ова советувалиште ќе ги научите основните техники за дишење и техники за релаксација. Денес постојат и едукативни работилници кои што нудат целосна психолошка подготовка пред породување, како и лесни вежби наменети за трудници. Редовната посета на овие советувалишта е важна исто колку и редовните прегледи, бидејќи техниките за намалување на анксиозноста најдобро ќе ве подготват за тоа што ве очекува.
Предвреме информирајте се за доењето
Односот мајка – дете е процес на постојано учење, па затоа не очекувајте веднаш да почнете да доите без проблем или пак бебето правилно да цица. Најдобро е во текот на бременоста да се информирате колку можете повеќе за целиот процес на доење за да знаете што да очекувате и со кои проблеми е можно да се соочите.
Набавете квалитетна пумпа
Информирајте се за пумпа за млеко пред да го донесете бебето дома. Електрична или мануелна, квалитетните пумпи го имитираат цицањето и не предизвикуваат болка, па затоа посветете време да најдете некоја што ќе ви одговара. Оваа постапка може да се изведе и без помош на пумпа, за што е потребно доста пракса.
Торбата нека биде подготвена
Неколку недели пред датумот, подгответе торба за во болница. Мала торбичка со средства за лична хигиена за вас, облека за првото излегување на новороденчето од болница, бебешко ќебе и облека за надвор која ќе биде соодветна за сезоната. Совет од мајките е задолжително да понесете чорапи, слушалки и полн телефон со вашата омилена музика за релаксација и опуштање.
Предвреме подгответе храна
Секој почеток е тежок, а првиот месец со новороденче е најтежок период, кога се навикнувате на потребите на бебето, недоволно спиете и кога нема да имате воопшто време за себе. И покрај сè, овој период е многу важно да се храните здраво и да јадете балансирана исхрана не многу различна од таа што сте ја јаделе кога сте биле трудни. Затоа, во периодот кога се ближи крајниот датумот, одвојте време за да подготвите вкусни оброци и замрзнете ги. Храната што ќе ја подготвите за еден викенд ќе ве ослободи од оваа обврска и многу ќе ви олесни подоцна кога нема да имате време за ништо друго освен за вашето бебе.
Наместете го седиштето за во автомобил
Како што се ближи датумот, сигурно ќе бидете под голем стрес и нема да имате трпеливост за внимателно читање на упатства, затоа детското седиште набавете го претходно и веднаш наместете го.
Одберете педијатар
Се подразбира дека ќе ги прашате за совет сите околу вас при одбирањето на педијатар, сепак ова е важна одлука, бидејќи го сакате најдобриот и најстручен педијатар. Токму затоа, одделете време да се информирате и да се консултирате со повеќе педијатари.
Планирање на непланирани трошоци
Секој од овие совети е корисен и значи планирање однапред. Ваквото планирање е добра практика и доколку не сте размислувале на ваков начин досега, време е да започнете, бидејќи доброто родителство значи и вложување на многу труд при планирање на време и финансиски ресурси, бидејќи зголемувањето на семејството подразбира и голем број на трошоци кои што едноставно не можете предвреме да ги испланирате.