Едно шведско истражување спроведено на лица над 75 годишна возраст потврди дека никогаш не е предоцна за да се подобри начинот на живот и здравото живеење дури и во поодминати години значително го продолжува животниот век
Модерниот начин на живеење довел луѓето да не сакаат да излезат од зоната на комфорот и најчесто за сите активности кои би требало да ги извршуваат, а не мораат си бараат соодветен изговор. Најпопуларниот изговор е дека сме престари, дека е предоцна… Поголема заблуда од ова нема. Факт е дека имаме поголеми предности во нешто да успееме доколку сме започнале да го практикуваме на порана возраст, но сè се може ако се сака! Дури и источните вештини може да се започнат и совладаат над 60 годишна возраст, исто така и талентот не е никогаш предоцна да се започне да се гради, а за водење на здрав начин на живот буквално никогаш не е предоцна.
„Многу од моите пациенти во нивните седумдесетти и осумдесетти се потсмеваат кога им велам дека не е предоцна за да започнат да го подобруваат својот живот и да започнат да живеат здрав животен стил“ – истакнува Д-р Дејвид Липшиц – David Lipschitz, директор на едукативниот центар за стареење Mruk Family, како и на здравствената клиника за сениори Fairlamb.
Ова го потврдуваат и научните истражувања. Имено, едно истражување спроведено во Шведска објавено во British Medical Journal, покажа дека развојот на здрав начин на живеење кај возрасните на возраст од 75 па нагоре, доведе до значително продолжување на нивниот живот. Ова истражување проследи 1.810 индивидуи на возраст над 75 години и тоа во времетраење од 18 години. Кон крајот на студијата, повеќе од 90% од испитаниците починале.
Истражувањето го испита значењето на водењето здрав начин на живот, но и влијанието на социјалното вмрежување и слободните активности.
Кога станува збор за здрав начин на живот, не се мисли само на консумирањето на квалитетна храна, физичката активност и количеството на квалитетен сон, елиминирањето на негативните активности (пушење цигари, пиење алкохол, дрога итн.), туку многу важно е и емотивното и психичкото здравје – повеќе љубов, повеќе пријателства.
Во оваа студија индивидуите се сметало дека водат здрав начин на живот доколку учествувале барем во една или повеќе лежерни активности и имале силни социјални контакти. Оние коишто имале нездрав начин на живот не учествувале во никакви лежерни активности, поголем дел од времето поминувале сами и имале само неколку пријатели. Дури и луѓето на возраст од 85 години со бројни хронични медицински состојби, кои живееле здраво според критериумите на студијата, живееле 4 години подолго од оние кои не живееле здраво.
Дури и поранешните пушачи живееле временски подеднакво како и оние кои што никогаш не пушеле!
Доколку придобивките од промената на животниот стил кон поздрав се очигледни на 75 годишна возраст, замислете ја вредноста на позитивните ефекти врз долговечноста кај луѓето кои се придржуваат кон правилата на здраво живеење во текот на целиот свој живот, започнувајќи од детството. Вежбањето во младоста помага подолго да живееме, но треба да имаме во знаење дека физичката активност во било која доба не може да му наштети на телото, туку може само да има придобивки.
Покрај здравиот развој на човекот, секој треба да внимава и дали здраво старее, бидејќи секој период од животот е подеднакво важен. Научно е докажано дека многу голема улога во начинот на кој старееме имаат гените, но сепак влијанието од наша страна (во рамките на можностите, поради временските ограничувања и здравствените состојби кои нè засегаат) исто така има големо значење врз овој процес. Не смееме да се предадеме на времето, туку за да имаме подобар живот треба постојано да се бориме за тоа на секоја возраст, бидејќи секоја возраст е подеднакво важна.
