Најново истражување ги истакнува предностите на вежбањето за време на адолесцентниот период кај жените
Вежбањето за време на адолесценцијата може значително да го намали ризикот од рак и кардиоваскуларни болести, покажува новото истражување. Ова истражување само го потврдува она што го знаат сите родители, а тоа е дека децата треба да вежбаат било каков спорт додека растат. Вежбањето е добро за нас, секогаш. Додека сме млади, тинејџери, адолесценти, зрели и стари. Во секој период од животот вежбањето е добредојдено, а здравствените придобивки бројни.
Истражувањето објавено на 31 Јули во медицинското списание Рак Еепидемиологија, Биомаркери и Превенција – Cancer Epidemiology, Biomarkers & Prevention, покажува дека жените кои активно вежбале како тинејџерки имаат намален ризик да заболат од рак, кардиоваскуларни заболувања и други болести подоцна во животот.
Обемната студија е заеднички плод на работата на „Vanderbilt University Medical Center“ и „Shanghai Cancer Institute“ и опфаќа анализи и информации од преку 70 илјади жени од Кина, на возраст помеѓу 40 до 70 години. Водечкиот научник на проектот, Сара Некута – Sarah Nechuta, заклучува дека вежбањето кај жените во адолесцентниот период значително го намалува ризикот да заболат од рак и многу други болести, без разлика дали подоцна во животот се занимавале со вежбање.
Клучот е во континуираното вежбање
Сите учеснички биле набљудувани од 1996 година, и од нив биле добиени детални информации за нивните физички активности помеѓу тринаесеттата и деветнаесеттата година од животот. Во предвид биле земени и други фактори како начин на живот, медицински фактори, начин на исхрана, индекс на телесна маса и историја на хронични болести. Учесничките кои се занимавале со спорт за време на адолесценцијата резултирале со 14 проценти намален ризик да заболат од рак и 10 проценти поголеми шанси за здрав живот. Оние кои продолжиле и понатаму да вежбаат во континуитет, го намалиле ризикот од сите заболувања за дури 20 проценти. Професорите од ова истражување тврдат дека придонеле да се докаже важноста на вежбањето, особено континуираното вежбање од младоста до зрело доба, активност со која значително би се намалил морталитетот и како превенција од болести подоцна во животот.
Оваа студија само уште еднаш потврди дека вежбањето е препорачливо во секој период од животот. Ги зајакнува телото и умот, го подобрува расположението заради лачењето на хормонот ендорфин во мозокот, кој дава чувство на среќа, го намалува ризикот од многу болести и нуди долговечност.
